15 Apr 2017 01:58

Serchhip Chelsea

Football chanchina chhiatna thleng țhenkhat

Football hian inlungrualna leh in unauna siam țhin mahse huatna leh in hmelmakna a thlen ve bawk a, hetiang boruak kara leng vel anih vang hian lungrual taka inkhel en ho theihloh chang a thlen tir fo țhin.

Kan ramah ngei pawh fans in tibuai leh fans buaina siam kan hmelhriat fo va, hetiang thil hi football-in a tum nilo mahse pehhel theih tak tak a nilo niin a lang.

Tun țumah hian football chanchina chhiatna thleng langsar țhenkhat kan lo tarlang a, kan tarlan zingah hian khawvel pawhin a hriatlar em em Hillsborough Disaster a tel lo va hemi chungchang hi chu nidangah kan la en ho dawn nia.

* BURNDEN PARK DISASTER : He chhiatna hi kum 1946 March ni 9-a thleng a ni a, mi 33-in nunna an chan.

Bolton Wanderers leh Stoke City inkhelh țumin a ni a stadium bang chimin mi thenkhat a delh a chhiatna rapthlak tak a thleng.

He inkhel hi mipui 85,000 chuangin a hmunah an en a, mi 33-in nunna chan phahin mi 400 velin hliam an tuar bawk.

He chhiatna thlen chhan ber ni a an puh chu pawnlama mipui 20,000 vel awm, luh an phalsak tawh silohte'n kawngkapui (gate) an su hawng a stadium bang chim zuiin an in chil zui ta chiam mai a ni.

* THE HEYSEL DISATER : He chhiatna hi kum 1985 May ni 29-a thleng a ni a, fans inkar buaina vang a ni.

Kum 1985 khan European Cup (Champions League ni ta) final-ah Liverpool leh Juventus an in hmachhawn a an inkhelhna hi Belgium khawpui Burssels-a awm Heysel Stadium-ah a ni.

Inkhelh țan hma darkar khat vel la awmah Liverpool fans țhenkhat chuan Juventus fans-te nen an in daidanna bang (fencing) chu tichhiain an bei chiam mai a, stadium bang hlui tawh tak a chim zui a mi 39-in nunna an chan bakah mi 100 chuangin hliam an tuar bawk.

Chhiatna hmasa a thlen hnuin Juventus fans thinrim leh Police an in bei zui a Juve fans hian lung leh bottle an hmang. An buaina vang hian inkhel an țhulh phah lova Juventus 1-0 in an chak. He chhiatna hi UEFA history-a, 'Hun thim ber' tih a ni.

He chhiatna thlen hnu hian UEFA chuan European competition-ah English club-te an phalsak lo va an hremna hi kum 1990-1991 season khan an sut. Kum 1995 khan Heysel Stadium hi țhiah darh vek a ni a King Baudouin Stadium sak a ni.

* ORKNEY DISASTER : He chhiatna hi chu kum 1991 January ni 13-a thleng a ni thung.

South Africa rama Orkney (Oppenheimer Stadium)-ah niin Kaizer Chiefs leh Orlando Pirates an inkhel a, Pirates fan hoin chemte hmangin Kaizer fans an bei vak mai a mi 42-in an boral phah. Hemi tuma boralte hi chil hlum an ni deuh vek.

He inkhel hi pre-season game ni mahse fan-te hian an la thutak hle.

* ELLIS PARK DISASTER : Hei hi kum 2001 April ni 11-a thleng kha niin South Africa-ah bawk a ni.

Johannesburg khuaa Ellis Park Stadium-ah Kaizer Chiefs leh Orlando Pirates tho an inkhel leh a stadium hi mipui 60,000 len theihna a ni bawk.

Club inhal tak an nih vangin en duhtu an tam a, pawnlama awm mipui 30,000 chuangin luh luih an tum a stadium-ah hian mipui 120,000 an in hnawh niin an sawi bawk.

Thutna (seat) inchuhin mipuite chu an in nawr buai chiam mai a mi 43 chuan nunna an chan phah.

Training mumal taka nei lem lo Security Guard lamin mittui tlakna hlo an hmang zui a hei hian buaina a ti punlun hle bawk.

* KAYSERI ATATURK STADIUM TRAGEDY : Kum 1968 September ni 17-a thleng a ni a, Turkey rama Kayseri Ataturk Stadium-ah a ni.

Kayseri Erciyesspor Turkish Sports Club leh Sivasspor Turkish sports club-te inkhelhlaiin fans in tibuaiin mi 44-in an thih phah a mi 600 velin hliam an tuar bawk.

An in tihbuainaah hian Silai, Chemte leh hmanraw hrawl tak tak an hmang a, he inkhel hi a hmunah mipui 21,000 dawnin an en.

Inkhelh laiin club pahnih fan-te hi lung hmangin an intawng a, Sivas fan-te hian him tumin khelmual leh kawngka (gate) lam an pan a khelmual lama tlanchhiate hi Police lamin an hmanraw hmangin an lo beilet ve thung.

Police hlaua tlanchhiate hian kawngka lam an pan zui a in chil zuiin chhiatna a thlen phah ta a ni.

Buaina a chhuah veleh referee-in inkhel ti tawp nghalin player-te'n an sa himnan dressing room an pan a, mikhual team Sivas player-te awmna phei chu Police-in khauh takin an veng zui bawk. Sivas fan-te hian khelmual an chhuahsan hnuin khawchhungah buaina an siamzui lirthei an hal a an che na hle.

* BRADFORD CITY FIRE DISASTER : Kum 1985 May ni 11 thleng a ni a, England ram Bradford khuaa Valley Parade Stadium-ah a ni.

Bradford City leh Lincoln City inkhelh laia thleng niin hemi ni hian Bradford City chuan Football League Third Division-a an champion lawm an tumna ni (day) a ni bawk. An stadium-a țhutna (seat) alo hlui ve tawh bawk nen rindan chuan tu emaw in meizial nung (cigarette) a paih vanga kangmei hi chhuak niin an ring.

Half time hma minute nga ala awmin kum 77 zeta upa tawh an țhutna ațangin meikhu a zam țan a, Police-te'n mipuite inthliar fihlim turin an ti nghal.

Minute thum vel lek hnu chuan kangmei chu a zual kai ta a, referee Don Shaw chuan inkhel a ti tawp a khelmualah mipui an tlan lut. A kan nasat hun chhung hi second 90 chhung vel lek ni mahse a hnuhma a turu hle.

Mi tam tak tlanchhe hmanlo leh tang an awm a, mi 56 chuan he kangmei vang hian nunna chanin mi 450 velin hliam an tuar bawk.

* THE LUZHNIKI STADIUM DISASTER : He chhiatna hi kum 1982 October ni 20-a thelng a ni a, Russia ram khawpui Moscow-a Lenin Stadium-ah niin he khelmual hi Luzhniki stadium tiin a hming thlak a ni tawh.

Hemi țum hian UEFA Cup (Europa League ni ta)-ah FC Spartak Moscow leh HFC Haarlem-te an inkhel a, ticket pawh nidang aiin an hralh tlem a hemi vang hian East Stand lama chhuahna chiah hawn a ni nghe nghe.

Venhimna thila chhuahna tur pakhat hemi stand a mi tho hi hawn a ni bawk. Huntawp hma minute khat chiah ala awm thlengin FC Spartak hian 1-0 in hma an hruai a, Spartak fans tam takte chuan ngaih țha tak haw tumin stadium an chhuahsan țan.

Hun pekbelhah FC Spartak tan Sergei Shvetsov chuan an goal hnihna a thun leh a, an thawm hre pha haw tum a stadium chhuahsan mekte chu kirin stadium-ah luh leh an tum a chhuah tum ve mekte nen chuan an in nawr buai ta.

Mi 66-in an boral phah a, mi 340 velin hliam an tuar a nunna chan zat hi thenkhat chuan mi 340 chuang an niiin an sawi thung.

Spartak goal hnihna thuntu Sergei Shvetsov chuan an inkhelh zawh hnuin, "Lo pet goal ta lo zawk ila tha tur." tiin a sawi.

* PUERTA 12 TRAGEDY : Kum 1968 June ni 23 a thleng a ni ve thuing a. Argentina ram khawpui Buenos Aires-a Estadio Monumental-ah a ni.

Hemi țum hian in hal em em mai River Plate leh Boca Juniors an inkhel a, buaina chhuak vangin mi 71-in nunna an chan phah a a, mi 150 chuangin hliam an tuar bawk a thi zat hi sawidan a in ang lo nual.

An buai țan dan pawh hi chi hrang harngin sawi a awm a, thiamlo zawk chhuichhuah a nilo hlen ta bawk.

Thenkhat sawidan chuan club pahnih fan-te chhuahna in an vang niin an sawi a, hetia an in kal pawh hi tihsual palh thil a ni thung a an in awmchilh hnu hian an in bei zui niin an sawi.

Sawidan dangah chuan stadium chhung chunglama awm Boca fans țhenkhatin River Plate flag halin a hnuailama awm Boca fans ve thote awmna hmunah an awmthla a hei hian in pawng nekna a thlen ta a ni.

Thenkhat chuan River fan-te'n Baca fans awmna an luhkhung niin an sawi ve bawk a, an buai lai hian chhuah an tumna lai lah kalh (locked) a ni bawk a hnunglam amite'n hmalam ngaichang lovin an nek chiam mai nia sawi an awm bawk.

* PORT SAID STADIUM DISASTER : He chhiatna hi kum 2012 February ni 1-a thleng niin Aigupta rama Port Said Stadium-ah a ni.

In hal kum hlun Al Masry leh Al-Ahly-te an inkhel a, Al-Masry hian 3-1 in hnehna an chang. Hnehna chang mahse Al-Masry fan lamin chintawk an hre lo va Al-Ahly fans an beiin player-te pawh kut an thlak hial.

Hemi buainaah hian Chemte, Sawidawium (bottle), ngunhnam (sword) leh thil alh thei chi (fireworks) an hmang a mi 79-in nunna an chan bakah mi 1000 chuangin hliam an tuar bawk.

* THE NATIONAL STADIUM DISASTER : Kum 1964 May ni 24 khan he chhiatna hi thleng a ni a, Peru ram khawpui Lima-a National Stadium-ah a ni.

Peru leh Argentina-in Olympic qualifying match an khelh laiin buaina a thleng a, buaina in țan chhan hi referee-in Peru pet goal a pawmsak loh vang a ni.

Mipui lam khelmualah an tlan lut a, stadium darthlang tikehin țhutnaah mei an chhem hluah bawk a pawisak an nei lo. Ram pahnih fan-te hi an in khuai nuai ta chiam mai a Police lamin mittui tlakna hlo nen țhelh tum mahse Police lam hi an tam tawk lo.

Buaina thleng vang hian mi 318 zet an boral a, mi 500 chuangin hlim na tak tak an tuar bawk.

"Catastrophe! The 100 Greatest Disasters of All Time" tih lehkhabu ziaktu Stephen J. Spignesi chuan he chhiatnaa nunna chan zingah hian nausen thla 18 mi pawh a tel tih a sawi a, he nausen hi apa in buaina karah him pui tum mahse a thlauh a chil hlum a ni zui.

THUBELH: Kan sawilan loh football-a chhiatna thleng hi ala tam a, tarlan vek sen a nilo. Mizote pawhin football kan atchilh a buaina pawh kan tawng fo bawk. Buaina hi dan theih ni mahse thunun theih piahlam a awm ve thei bawk a venhimna țha bakah buaina siam lo tura in zirtir tam a țul khawp mai.

# Photo: Heysel Disaster/dpa