Finals MVP atan Kevin Durant an thlang

09th June 2018, 11:06PM

Golden State Warriors in Cleveland Cavaliers hnehin NBA title an la a, Kevin Durant chu 2018 NBA Finals MVP atan an thlang.

Warriors forward Durant hi a zawnin Most Valuable Player atan hian an thlang ta a, feet 6 leh inches 11 a sang Kevin Durant average hi game tinah 28.7 points niin, rebound 10.7 leh assist 7.5 a ni a. Game 4 ah hian playoff triple-double a nei a point 20 a thun a, rebound 12 lain assist 10 a nei a ni.

Game 3 ah khan Durant hian point 43 ngawt mai a thun a, hun tawp dawn hnaihah a pawlte chu a chakpui a. Most Valuable Player tur hian Stephen Curry pawh rin kai ber zinga mi a ni a, mahse Durant hi an thlang ta zawk a. Finals MVP atana vote tlak danah Durant hi 7-4 in a chungnung zawk a ni.

Nikumah Durant bawk hi MVP atan an lo thlang tawh a, 2016 khan LeBron James an thlang a, hemi hma kum 2015 khan Andre Iguodala an lo thlang tawh bawk a. Durant hi Finals MVP vawi 2 ni thei zingah 11-na a ni a, a zawna he chawimawina vawi 2 dawng thei parukna a ni bawk a, a hmain Michael Jordan, Shaquille O’Neal, LeBron James, Hakeem Olajuwon leh Kobe Bryant te chuan a zawnin an lo dawng tawh a ni.

NBA Finals MVP atan Michael Jordan chu vawi 6 ngawt an thlang tawh a, he chawimawina dawng hnem ber a ni a. Magic Johnson, Shaquille O’Neal, Tim Duncan leh LeBron James te chuan vawi 3 theuh an dawng tawh bawk a. Kobe Bryant, Larry Bird, Hakeem Olajuwon, Willis Reed leh Kareem Abdul-Jabbar te bakah Kevin Durant te chu vawi 2 dawng tawhte an ni.

2009 atang khan he chawimawina hi Celtics player ropui Bill Russell hming an chawitir a, vawi 11 ngawt mai lo champion tawh hian he chawimawina hi an hunlai khan siam tawh se chuan a dawng hnem viauin a rinawm hle. Finals MVP hi 1969 atang khan an ti tan a, Kevin Durant hi he chawimawina dawng thei player 30 zingah a tel a ni.

Copyright © inkhel.com 2024. All rights reserved.