Fans ten an ngaina em em lo, hetih lai hian Jose Mourinho chuan Europa League title a lak theih nana player tangkai ber pakhat a ni tlat si. Fellaini chungchang hi Manchester United defender hlui Ferdinand chuan sawi chhuakin, Mourinho-a game khelhpui dana tangkai ber pakhat a ni a ti.

Nilaini zan khan Manchester United chuan si hnih faia Ajax hnehin 2016/17 Europa League champion an ni a, Ajax an hneh theih nan hian Fellaini chuan tha a thawhhlawk hle.

BT Sport pundit Rio Ferdinand chuan, "Player dangte tan a ngainatawm loh ve chiang alawm. Mahse Jose Mourinho-a'n a mamawh dan angin a khel mai thei a. Chu chu a pawimawh hle a ni.

"Ani aia ball dawng thei midang an awm kher lovang. A chest thla a, a tauh per tha em em bawk a, ball a lakthlak chu a pawlte tan a pe leh bawk a.

"Ball lathlaa, mawi tak taka khalh kuala passing tha tak tak nei turin beisei suh u. A khingpuite tan a hnawk em em a, a kiu leh khup te chu an khingpuite tan a hnawk em em, Mourinho-a'n a duhdan game ang taka a khelh theih nana player tangkai ber pakhat a ni," tiin a sawi.

Stockholm-a final match-ah khan Fellaini hian a khingpuite nena ball inchuhna kawngah vawi 15 lai a tauh a, tackle hlawhtling vawi li a neih bakah hlawhtling takin vawi thum a khalh a, ball hlauhawm vawi hnih a thenfai bakah Pogba goal khung tur a siam sak bawk a ni.