La Liga chuan Thawhlehniah Facebook nen inremna an siam a, hemi zarah hian India rama chengte chuan Facebook atang hian season thum chhung chu a thlawnin La Liga a en theih dawn a ni.
Zirtawpni atang hian La Liga season an tan dawn a, league match 380 zet mai chu India ram mai bakah Afghanistan, Bangladesh, Bhutan, Nepal, Maldives, Sri Lanka leh Pakistan atangin Facebook-ah hian a thlawnin a an theih dawn niin an sawi.
La Liga head of digital strategy Alfredo Bermejo chuan, “India ram leh a chhehvela a thlawna inkhel en theiha a awm tur hi lawmawm kan ti a, hetiang buatsaih thei tur hian theihtawp kan chhuah a ni,” a ti a.
“Tun hnai kum hnih chhunga kan thil tum lian ber pakhat chu khawvel hmun hrang hranga a tam thei ang berin La Liga an en theihna tura tan lak a ni a. Facebook nen kan inbia a, inremna thuthlung kan siam hnuah India rama mipui maktaduai 270 zette en theih turin kawng kan buatsaih ta a ni,” a ti bawk.
Facebook leh La Liga te chuan Sony Picture Network chu TV lama inkhel tichhuak turin an thlang a, henga an inremnaah hian sum engzat nge an inpek dawn tih chu an sawi chiang duh lo a. Sony hian 2014 leh 2018 inkara La Liga inkhel tichhuak turin $32 million an lo seng tawh niin an sawi a ni.
2017 atang khan Facebook chuan sports streaming lampang hi an ti tan a, kar tin Major League Baseball an tichhuak thin a, tun thla tirlam khan broadcaster Eleven Sports nen thuthlung an ziak a, kar khata La Liga game pakhat leh Serie A game pakhat zel tichhuak turin an inrem a ni.
Kumin kum tir khan Amazon chuan 2019 atangin Britain bika English Premier League match 20 tichhuak turin thuthlung an lo siam tawh a ni.
Facebook Director of Global Live Sports, Peter Hutton chuan La Liga nen inremna an siam chu en chhinna a nih thu sawiin, tun tuma an hmalakna tur hi a that leh that loh en chhin phawtna a nih thu a sawi a, thutlukna dang engmah siam belh vak an tum rih loh thu a sawi a. Hun eng emaw chen an en chhin hnuah a tha dawn a nih chuan an kal zel dan tur an la sawi chawp leh dawn niin a sawi a ni.
India ram ringawtah Facebook hmangtu hi 348 million an tling a, nikum chhung khan social network atanga La Liga entu hi 2.2 million vel zetin an pung niin an sawi.