Nizan FA Cup 5th Round match-ah Wigan chuan si khat faiin Premier League hmahruaitu Manchester City an hneh a, halftime leh inkhelh zawhah buaina tenau a chhuak.
First half tawp dawnah Delph chuan Max Power a tlawh, referee Anthony Taylor chuan Delph hi a hnawtchhuak nghal. Half time a ni chhunzawm a, tunnel-ah Pep Guardiola a inthunun zo lo, Wigin manager Paul Cook nen an inbakkaih.
PLAYER RATINGS
WIGAN ATHLETIC: Walton 7, Byrne 7, Elder 7, Perkins 7, Power 7, Grigg 8, Massey 7, Roberts 7, Dunkley 7, Powell , Burn 9. Subs: Fulton 7, Jacobs 7, Coclough 7.
MAN CITY: Bravo 6, Danilo 5, Stones 6, Gundogan 7, Aguero 6, Laporte 6, Delph 4, Sane 5, Bernardo 5, Silva 6, Fernandinho 6. Subs: Walker 5, De Bruyne 8.
Second half 79 mins-ah Will Grigg chuan City defender pathum tlanpelin bottom corner-ah mawi takin goal a khung, he goal hi Wigan chakna leh FA Cup quarter final an luhphahna a ni chhunzawm.
Hun a tawp a, DW Stadium-a inkhel entu Wigan supporter lawm em em chu mual chhungah an tlan lut. Aguero chuan Wigan supporter pakhat a namsawn nawk a, kut inthlak tumin an inpan, Aguero hi player leh coaching staff ten an dang bawk a, boruak a tang hle nghe nghe a ni. He buaina hi FA chuai a chhui chiang ngei dawn a, hrem ngai pawh a hrem ngei rin a ni.
Wigan hian kum 2013 FA Cup final-ah khan si khat faiin Manchester City hi an lo hneh tawh bawk a, tun tumah hian FA Cup atangin an hnawtchhuak leh ta bawk a ni.
Manchester City boss Pep Guardiola chuan, "Wigan ka lawmpui em em a ni. Kan theih tawp kan chhuah a, final ang maia game tangah tihsual kan nei, engpawh nise kan chaklohna hi kan pawm a, a chak zawk kan lawmpui a ni," tiin a sawi.
Wigan boss Paul Cook chuan, "Hun hlimawm leh ropui tak a ni e, team tha zawk an ni a, ball an thiamin an tlanpui vawng vawng thei. Kan vannei a, red card kha game tidanglamtu a ni e.
"Ka nau te an thawkrim em em a, fak an phu. A goal tur an lo dan thenkhat te phei kha chu a ropui hlawm khawp mai," tiin a sawi bawk.
FA Cup quarter final-ah Wigan hian Southampton an hmachhawn anga. Premier League club lian zingah Chelsea, Manchester United leh Tottenham an la dam a. Chelsea chuan Leicester City an hmachhawn anga, United chuan Brighton an tum ang. Tottenham leh Rochdale erawh an inhnehtawk avangin Wembley Stadium lamah replay an khelh leh phawt a ngai dawn a ni.