Everton aiin kan tha zawk - Coutinho

28th March 2017, 07:03AM

Season kal mekah Everton hi an chhetha chho hle a, mahse Coutinho erawh chuan a hlauh lemloh thu a sawi.

Nikum December thla a Liverpool-in Goodison Park-a Everton an hneh hnuin Ronald Koeman-a naute an chhetha chhunzawm hle a, khelh 12 atangin vawikhat chiah an tlawm a, tum 8 an chak tawh.

Everton hian season tharah Europe inelna khelh ngei an tum a, tunah table-ah 7-na niin an chung chiaha awm Arsenal chu point hnih chiahin an thlau a ni.

Liverpool attacker Coutinho chuan Sky Sports hrilhin, "Everton hian ka rilru an ti hah lem lova, ngaihtuah pawh ka ngaihtuah em em lo bawk.

"Everton aiin kan tha zawk a, league-ah kan dinhmun a tha zawk bawk. Hei hi thil nihna diktak a ni a, kan pawm tlan mai a tawk rih a ni.

"Keini lam chu kan inring tawh e, derby match hi chu a danglam bik a, player leh club tan pawh inkhel chhinchhiah tlak bik a ni thin.

"Derby awmzia chu kan hre vek a, Liverpool khaw mipuite rilru put hmang pawh kan hrechiang a, chak kan duh. Tin, tunhnaiah Everton an rawn chetha em em bawk a, ani tan pawh chakloh chu a na hle ang.

"Inkhel awlsam a ni dawn lova, mahse chak kan tum ang. Min tantute tan a pawimawh a, player-te rilru puthmang thlak danglam theitu leh minti hmasawntu tur a ni bawk. Kan club mi leh sa zawng zawng tan leh Liverpool khaw mipui tan a pawimawh em em a ni, "tiin Anfield-a inkhel turah chak a pawimawh thu a sawi.

Liverpool hian Anfield-ah April ni 1 khian Everton mikhualin Merseyside derby an khel ang.

Copyright © inkhel.com 2024. All rights reserved.