​Europe Top 5 league-a chak loh nei tlemte

25th April 2017, 05:04PM

Europe-a league lian zual pangaah(England, Spain, Germany, France, Italy) team tha tak tak an ther fur a, season tluana inkhel kual an nih avangin team lian leh table hmahruaitu pawhin tlawm chang an ngah thin hle. A hnuaiah hian chak loh nei tlem team kan tarlang e.

1. Nice 2- Season tir lama an hmahruaina humhim zo lo mahse Lucian Favere-a naute hi beisei phak bakin an khel tha a, Ligue season kal mekah Nice hi tum hnih chiah an la tlawm a ni. Caen leh Monacao an hneh lohna inkhel hi khualmuala an zinchhuah tumah ve ve a ni bawk.

2. Bayern Munich 3- Bundesliga-a team awmte enin Bayern elpha tak tak tur an awm lo tih theih a ni. Bavarians hian league game 30 an khelh tawhah tum hnih chiah tlawm an la nei a, Hoffenheim leh Borussia Dortmund bakin Bayern lakah point 3 an hlawchhuak zo lo.

3. Real Madrid 3- Zinedine Zidane hnuaiah Real Madrid-in hma an sawn a, Los Blancos hian La Liga season kal mekah tum thum chiah chiah tlawm an la nei a ni. El Classico-ah Barcelona an hneh lo a, Valencia leh Sevilla lakah point khat mah an hlawhchhuak zo lo bawk.

4. Monaco 3- Season tan dawn khan football khawvelin Monaco chunga beiseina an dahsang lo hle. Chelsea leh Manchester United kawl chhunzawm duh loh Radamel Falcao bak player langsar kawl lo mahse Ligue 1 hmahruaitu an ni a, Champions League semi-final an lut tawh bawk. Kylian Mbappe, Thomas Lemar, Fabinho, Bernardo Silva, Tiemoué Bakayoko-te hi season tharah chuan Monaco tan chelh chhunzawm an har hle ang.

5. Manchester United 3- October thlaa Chelsea an hneh loh hnu khan Manchester United hi league-ah an tlawm leh tawh lo a, Blues an hneh loh hma khan Watford leh Manchester City lakah an lo tlawm tawh bawk. League game 23 chhung tlawm nei loin an kaltluang tawh a, Premier League champion erawh an tan beisei ngam chi a ni chuang lo.

6. Hoffenheim 3- Antonio Conte, Pep Guardiola, Jurgen Kloop leh Jose Mourinho-te angin Julian Nagelsmann hi i hre lar lo a nih pawhin i demawm loh e. Kum 29 mi lek Nagelsman hian season tan dawn khan Hoffenheim a enkawl tan chauh a, Bundesliga-a a season khtanaah hian tum thum bak a la tlawm lo. RB Leipzig, Wolfsburg leh Hamburg lakah bakah tlawm an la nei lo.

7. Tottenham Hotspurs 3- Premier League team hmuhnawm ber pawl Spurs hian nomawi chawi lo bawka season an khar leh a nih chuan an player thate chelh an harsat ang tih a hlauhawm hle. Liverpool, Chelsea leh Manchester United bakin Spurs lakah point thum an hlawhchhuak thei lo.

* League game bak en a ni lo a, Europe leh tualchhung inelna lamin nghawng a nei lo. April 25 thlenga an record atanga ziah a ni.

Images: Getty

Copyright © inkhel.com 2024. All rights reserved.