Cristiano Ronaldo chuan Morocco nen an inkhelhin Portugal chakna goal a thun a, heti hian Europe khawmualpui bikah chuan ram tana goal thun hnem ber a ni ta.
Group B match hmasa an khelh tumin Portugal leh Spain chu 3-3 in an inhnehtawk a, he inkhelah hian Ronaldo chuan hattrick a siam a, goal thun hnem ber record awm sa a nihrual chiah a. Ram tana goal 84 thuntu, Hungary superstar Ferenc Puskás chuan 1945-1956 chhung khan he record hi a lo siam a, Cristiano Ronaldo hian a nihrual chiah a ni.
Morocco nen an inkhel leh a, 1-0 in Portugal hi an chak a, he inkhela goal awm chhun hi Cristiano Ronaldo thun niin, ram tan goal 85 a thun ta chiah a, Ferenc Puskás chu a khum ta a ni.
Ronaldo hian khawvel pumah chuan tluk loh pakhat a la nei thung a, Iran striker Ali Daei record siam khum tur chuan goal la thun belh nual a ngai dawn a. Ali Daei hian ram tana vawi 149 khelhah goal 109 ngawt mai a thun a, khum a harsa ve viau ang.
World Cup 2018 bikah Cristiano Ronaldo hian goal 4 a thun tling chiah a, match 2 khelha goal 4 a thun hian tun tournament bikah chuan a aia goal thun hnem an awm rih lo a. 1966 a Jose Torres record lo siam ang chiah a puitlin bawk a, World Cup tum khatah Cristiano Ronaldo hian a ke veilam, a ke dinglam leh a lu hmangin goal a thun vek a ni.
Goal 85 a thun hian hattrick vawi 5 a siam a, match khata goal 4 thun pawh tum khat chu a nei a. Goal hnih hi vawi 14 a thun a, a bak goal 38 hi chu match khata goal khat thun zel a ni.
Ronaldo goal thun 85 ah hian goal 39 chu home-a a thun a ni a, goal 30 chu away-ah niin, goal 16 dang leh chu international tournament-a a thun a ni.
2006, 2010 leh 2014 Wold Cup ah te khan Cristiano Ronaldo hian goal khat theuh a thun thei a, Russia ramah chuan a hma nen a inang tawh lo hle.
European top scorers:
Cristiano Ronaldo (Portugal) - 85 goals in 152 appearances
Ferenc Puskás (Hungary & Spain) – 84 goals in 89
Sándor Kocsis (Hungary) – 75 in 6
Miroslav Klose (Germany) – 71 in 13
Gerd Müller (West Germany) – 68 in 6
Robbie Keane (Republic of Ireland) – 68 in 14
Zlatan Ibrahimovic (Sweden) – 62 in 11
Imre Schlosser (Hungary) – 59 in 6
David Villa (Spain) – 59 in 9
Jan Koller (Czech Republic) – 55 in 91