​Engvangin nge I-League season thar a nghahhlelhawm em em?

05th January 2017, 09:01PM

India ramin football kan ngaihven chho tial tial a, football-a league kan neih upa ber I-League erawh hi chuan ngaihsak a hlawh tawk lo niin sawi a awm fo. India Super League (ISL)-in I-League hi a hliahkhuh nasa hle tih phat rual nilo mahse I-League hian India rama football thi mai tur a khai ding hram hram thin tih theihnghilh chi a nilo.

ISL season a zo fel tawh a I-League season tharin min hmuak. Season liamta I-League-ah khan a vawikhat nan Mizo club Aizawl FC chuan hmel an lan a, season thar lo awm turah pawh Mizoram Premier League (MPL)-a vawihnih champion tawh team hi I-League-ah kan hmu leh ang.

I-League season thar lo awm turah hian club thar bakah player thar leh khawpui tharte kan hmu nual dawn a, a nghahhlelhawm takzet. Kawng hrang hranga season thar I-League nghahhlelawm nachhan tur thenkhat han tarlang ta ila.

*TEAM TEL TUR AN PUNG

Season liamta I-League-ah khan team pakua (9) an inlan a, season tharah erawh team khatin an pung dawn a team sawm (10)-in I-League hi an khel ang.

KHELHNA TUR HMUN PAWH A PUNG

Season thar I-League hi khelmual hrang hrang pakua (9)-ah khelh a ni dawn a, Kolkata khawpui chiahin team hnih (Mohun Bagan leh East Bengal) an nei.

HMEL THAR PAHNIH

Season thar I-League-ah hian hmel thar pahnih kan hmu dawn a, chu chu Minerva Punjab FC leh Chennai City FC-te an ni.

Churchill Brothers pawh team thar huanga khung thei ni mahse an ni hi chu I-League-a team hlauhawm thin an ni a, 'Team thar' anga chhal theih ni mahse Indian football-in a hmelhriat sa tawh tlat.

Team tel thar turte hian mi tam zawk la hriat ngailoh player thar, khelmual thar leh fans tha tak tak an rawn ken tel ngei a rinawm a, hei ringawt pawh hian I-League season thar lo awm tur hi a ti nghahhlehawm hle.

BIG THREE

'A sawi lawk theih dawn em ni? ti a zawhna siam pawh kan awm maithei e, mahse a lian zual pathum hi chu an awm dawn chiang. Kan hmelhriat ber English Premier League (EPL)-ah pawh Big Four an awm thin a league tinah 'Big' hi chu an awm deuh vek.

Season thar I-League-ah pawh hian Bengaluru FC, Mohun Bagan leh East Bengal-te an len fal deuh a rinawm nghal. Season liamtaa champion Bengaluru FC hian point hnih chauhin anmahni hnaih bertu Mohun Bagan an tlansan thei hram a, Bagan hian 2015-2016 season khan point tlemte bawkin Bengaluru FC hi an thlau va I-League nomawi an chawi anih kha. Season tharah pawh an inum leh deuh bik a rinawm.

AIZAWL FC & CHURCHILL BROTHERS AN KIR

Season liamta I-League-a a mawngphah dawltu Aizawl FC-in I-League an khel leh thei dawn a, hei hi Mizote tan mai nilo I-League hmangaihtu tan chuan thu lawmawm a ni.

Aizawl FC hian season liamtaa an sulhnu duhawm loh tak ang kha chu hnutchhiah an tum tawh dawn lo tih a hriatsa vek a, inkhel thunun chunga chak theihloh kha an duh tawh dawn lo. Player thar neiin Coach thar an nei a an thatpui ngei a beiseiawm.

Indian football-a kan hmelhriat tawh thin Churchill Brothers lokir hian boruak a siam ve viau bawk a, champion leh tumin an beih nghal ngei a rin theih.

FANS AN THA LEHZUAL ANG

European club-te'n fans an nei a, an fan-te hian hming an nei thin. I-League club zingah pawh hming nei khawpa intelkhawm thei fans nei an awm a, chu'ngte chu - The Yellow Brigade (Mumbai FC), West Block Blues (Bengaluru FC), The Mariners (Mohun Bagan), East Bengal Ultras leh a dangte an awm nual.

Season liamta I-League en hnem chuan kan hre theuh awm a, I-League club-te hian fans ruh tak tak an nei a hei hi club leh player-te tana thil pawimawh leh lawmawm a tling.

TV ATANGIN KAN EN HNEM THEI DAWN

I-League season thar lo awm tur hi Ten Sports bawkin an LIVE leh dawn a, thu lawmawm deuh chu season hmasa ai khan LIVE-in I-League hi TV-ah kan en hnem thei tawh dawn.

Season thar I-League-ah hian game/match 90 a awm dawn a, game/match 75 chu LIVE-in kan en thei ang. LIVE-a kan en tam theih chuan I-League hi kan ngainat phah dawn tih a chiangsa reng.

* 2016-2017 I-LEAGUE KHEL TURTE:

Aizawl FC

Bengaluru FC

Chennai City FC

Churchill Brothers

DSK Shivajians

Mohun Bagan

East Bengal

Mumbai FC

Shillong Lajong

Minerva Punjab FC

 THUBELH: 

Tun season-ah hian Bengaluru FC leh Mohun Bagan-te'n AFC intihsiakna an khel dawn a, Bengaluru FC hi chuan 2016 Asia Cup-ah khan final an lut pha nghe nghe.

I-League season thar lo awm tur hi I-League kan neih hnuhnun ber a ni tawh maithei a, All India Football Federation (AIFF) chuan India ramah football tih hmasawn an tum a hei vang hian league kalphung tih danglam tumin hma an la mek a ni.

India ram Chhim leh Hmar, Chhak leh Thlang atanga team hrang hrang sawmin I-League season thar hi an khel dawn a, Hmar lamin Minerva Punjab FC an nei a Chhim lamin Bengaluru FC leh Chennai City FC an nei thung. Khawthlang lamin Mumbai FC, DSK leh Churchill Brothers an neih laiin Khawchhak lamin East Bengal leh Mohun Bagan an nei a Hmarchhak lamin Aizawl FC leh Shillong Lajong kan kawl ve bawk.

Season liamta ang bawk khan Aizawl FC khelmual (home game khelhna tur) chu Mualpui-a awm Rajiv Gandhi Stadium a ni leh ang

Copyright © inkhel.com 2024. All rights reserved.