12 Jul 2018 02:36

Inkhel

Mizo Sports Website hmasa ber

​England hnehin a vawi khat nan Croatia-in WC final lut

England chuan final luh tum hle mahse Croatia player class tak tak an paltlang zo ta lo, Trippier chuan England tan goal khung mahse Perisic chuan Croatia siphurh a rul a, hun pangngaiah 1-1 in an inhnehtawk, extra time khelh a ni, extra time second half-ah Mandzukic chuan Croatia chakna goal a khung a, 2-1 in hnehna an chang ta.

A vawi khat nan Croatia chuan World Cup final an lut, July ni 15 zanah France leh Croatia te chuan 2018 Russia World Cup final an khel dawn ta a ni. Team hnihte hi an inbei tawk em em a, hetih lai hian team balance nei tha Croatia chu second half leh extra time-ah an khel tha, chu chu an chakpui ta a ni.

Croatia 2-1 England

(Perisic 68', Mandzukic 109') (Trippier 5')

PLAYER RATINGS

Croatia - Subasic 6, Vrsaljko 8, Vida 7, Lovren 8, Strinic 7, Rakitic 8, Modric 8, Rebic 7, Brozovic 7, Perisic 7, Mandzukic 8. Subs - Kramaric 6, Corluka 5, Pivaric 5.

England - Pickford 8, Walker 7, Stones 7, Maguire 6, Trippier 6, Henderson 6, Young 5, Lingard 6, Dele 5, Sterling 7, Kane 5. Subs - Rashford 5, Rose 5, Vardy 5, Dier 5.

Croatia chuan 4-2-3-1 formation an rawn hmang, England chuan Croatian midfielder tha tak tak dang turin midfield-ah panga an rawn inhawh a, wing back hmang lehin 3-5-2 formation hmangin bul an tan.

Inkhelh tan atanga minute ngana lekah goal a lut tlat mai. 20 yards velah Luka Modric chuan Dele Alli a titlu, referee chuan free kick a ham a, he free kick hi Trippier chuan top corner-ah mawi lutukin a pet goal, Trippier hian ram tan a goal hmasa ber a khung ta a ni.

1966 World Cup hnuah set piece atanga goal khung hnem ber chu England an ni ta a, set piece atangin goal 9 lai an khung tling ta. Team hnihte an innawr tawk dun hle a, an hmatawngte ve ve an lawr zawk zawk thin.

First half-ah hian Rebic-a chance tha zet chu Young chuan a lo tlawh kawi sak bakah Alli ball pek tha zet Lingard chuan box pawn atangin a dah goal teuh hle bawk. Second half tan tirah England chuan an goal hnihna an khung teuh hle. Mual dinglam sir atanga Trippier cross tha zet chu Kane chuan a tauh goal ngei dawn nia a lan laiin Lovren chuan a lo clear sak hman.

Croatia an khel tha chho zel a, an game tempo pawh a rang chho tulh tulh, Perisic a che na chho hle, 68 mins-ah Croatia chuan an siphurh an rul ta nge nge. Mual dinglam sir atanga Sime Vrsaljko cross tha zet chu Perisic chuan sang taka ke khaiin mawi danglam takin a pet goal ta.

Croatia an khel tha chho zel a, England defender te an tal buai leh zauh thin, defender tihsual avangin Perisic chuan chance tha tak a nei, box veilam sir atangin a shot, England goal post a per a, hemi per hi Rebic chuan a pet goal ngei dawn nia a lan laiin a duhthusamin a pet thei lo, Pickford chuan a lo man sak ta a ni.

Hun pangngai a zo a, 1-1 in an inhnehtawk, extra time khelh a ni a, extra time first half-ah hian goal khungna chance tha lutuk vawi khat ve ve an nei. England corner chu Stones chuan hnai tak atangin a tauh, Sime Vrsaljko chuan goal line atangin a lo tauh chhuak. Mandzukic pawhin goal a khung teuh hle, mual veilam sir atanga Perisic cross chu Mandzukic chuan hnai set sawt atangin a pet, hei hi Pickford chuan a lo save.

Extra time second half tirah Mandzukic chuan goal a khung ta nge nge, Ivan Perisic tauh chu England defender pahnih inkar atanga rang taka rawn tawlh chhuakin Mandzukic chuan box veilam atang chuan bottom corner-ah a pet goal ta. He goal hi Croatia chakna goal a ni chhunzawm ta a ni.

First half-ah England-in midfielder nei tha Croatia an tibuai hneh hle, Rakitic leh Modric te an an che hleithei lo, Sterling leh Harry Kane ten first half kha hmang tangkai selang chuan si hnih faiin hma an hruai anga, chak theihna chance an nei tha khawp ang le.

Hetih lai hian second half-ah Croatia chuan an khelh thin dan angin an rawn khel chho thei tan ta, game tempo rang tak nen ball an keng ta zel a, England midfielder te an talbuai, wing-ah Perisic a dawk zawk zawk bawk nen, mual dinglam leh vei lam atangin an vawr chhen tawh bawk a, Croatia khan inkhel an thunung kan ti thei awm e. 1966 hnuah champion tum hle mahse Croatia chuan England beiseina an titawp ta a ni.