09 Aug 2018 12:43

inkhel

Eng vangin nge goalkeeper an to tak em em?

Football khawvelah sum hrawm a na chho zela, pound maktaduai 50 aia hniam chuan player tha lakluh tur an vang tawh hle a ni.

Hetih lai hian goalkeeper-te pawh an hlutna a pung chho ve zela, club-te pawhin goalkeeper lakluh nan pound maktaduai 50 chuang lai an thehchhuak phal tawh.

Nikum nipui bazar-ah Manchester City chuan Brazilian goalkeeper Ederson chu pound maktaduai 35-in an lalut a, a hunlai khan goalkeeper manto ber a ni. Goalkeeper manah City-in heti ang zat sum an thehchhuak ngam hi mi tam tak chuan mak an ti a, mahse kuminah erawh thil a danglam chiang hle.

Kumin nipui bazar-ah Liverpool chuan Roma atangin Brazil no.1 Alisson Becker chu pound maktaduai 67-in an laluta, football khawvel a meng phar nasa hle. Alisson hi hun eng emaw chen chu khawvela keeper manto ber a nih a rinawm em em laiin, thla khat vel awrh keeper manto ber a nih hnuah chuan khumtu an awm ta der mai.

Chelsea chuan Athletic Bilbao atangin Spanish goalkeeper kum 23 mi Kepa Arrizabalaga chu pound maktaduai 71.6-in an laluta, khawvela keeper manto ber an ni chiang hle a, football khawvel a barakhaih a ni.

Kepa hi a release-clause vanga to ni mahse, eng vangin nge Chelsea hian hetaing zat zeta an khul chhuah ngamna chhan hi mite zawhna a ni.

Football a danglam chho zela goalkeeper-te hian sweeper role an khel tel deuh tawha, Manuel Neuer pawh keeper tha bera ngaih a nihna chhan chu a ball sem a thain, ball a thiam a, sweeper ang deuhin a khelh telh theih vang a ni a, sweeper-keeper an ti hial thin.

Pep Guardiola game-ah pawh hian keeper-te an tangkai em em a, hemi avang hian Premier League Golden Glove award vawili dawng tawh Joe Hart pawh a hmang duh lo hiala, Hart hi keeper tha tak ni mahse a ball khawih leh sem a that tawk loh avangin a aiah Willy Caballero hmangin a hnuah Ederson a lei ta a nih kha.

Chelsea manager thar Maurizio Sarri game-ah pawh hian keeper atanga game-play tan a ni tlangpui. Kepa hi Courtois ai pawhin a ball sem hi a tha tura ngaih a ni a, season liamta khan ani aia long-range pass dik nei hnem La Liga-ah an awmlo.

Alisson pawh hi goal venhim bakah hetiang kawngah hian a tha hle a, season liamta khan Champions League en thang chuan kan lo hre tawh a ni.

Keeper-te hi an tangkaina a pung tawh pawh a ti theih awm e, hemi a nih avang hian an hlutna pawh hi a pungin, club-te pawhin an ngam huai zual ta hle niin a lang.

Goal venhim ngawr ngawr lamah chauh an tangkai tawh lova, game kaihruaitu zinga mi pakhat an ni tawh a, keeper tha leh thalo inkar a hlat leh zualna chen a awm tawh a ni.

Goalkeeper man a to tak em emna chhan hi chhan leh vang tam tak a awm thei a, kan sawi tak pawh hi a chhan leh vang pakhat zingah a tel ve ngei a rinawm.