Emre Can-a’n Juventus a pan ta

21st June 2018, 11:06PM

Emre Can chuan Liverpool chhuahsanin Juventus a zawm ta a, thil Turin khawpuiah thil tul an tifel a, Juventus club chairman Andrea Agnelli chuan Emre hi mipui hmuhah a pho chhuak nghal.

Kum 24-a upa Germany midfielder hi Liverpool chuan contract thar ziahpui an tum a, mahse an inrem thei ta lo a, a contract a hman zawh tak avang hian man loin Juventus hi a zawm ta a. Emre hian Liverpool-a a number thin 23 tho kha Juventus-ah pawh a ha leh dawn a ni.

Can hian senior team lama a hun hmasa chu 2011-13 khan German club lian Bayern Munich ah a hmang a, 2013-14 khan German club tho Bayer Leverkusen ah a khel a. Bayer Leverkusen atangin Premier League club Liverpool chu 2014 khan a zawm a, tunah Serie A boruak a tem ve leh dawn a ni.

Liverpool chuan Emre Can hi Anfield-a chelh zui tumin theihtawp an chhuah a, mahse an inrem thei ta lo a. Can hian Liverpool tana a khelh hnuhnun ber chu UEFA Champions League final-a Real Madrid an hneh loh kha a ni.

Hetianga Emre Can a chhuah takah chuan Liverpool hian a hmun ruak luah khat tur hi an melh nghal a. RB Leipzig midfielder Naby Keita leh Monaco midfielder Fabinho te chu an be fel tawh a ni.

Anfield-a a awm chhungin Emre Can chuan game 167 a khel hman a, hengah hian goal 14 a thun a. Germany tan pawh vawi 20 chu a khel tawh a, mahse Joachim Low chuan Russia rama Germany aiawha khel turin a ko tel ve ta lo.

Copyright © inkhel.com 2024. All rights reserved.