Emirates Stadium-ah Arsenal an chak zo lo

23rd October 2016, 06:10AM

Arsene Wenger naute'n Champions League lamah goal ruk zet thun mahse inrinni zan Premier League-a an mikhual Midlesbrough lakah goal khat pawh an thun thei lo.

Premier League kai thar Middlesbrough pawhin goal an thun thei bik lo a, Jose Mourinho assistant hlui Aitor Karanka naute'n an hna an hrechiang a, Arsenal lakah goal thun aiin venhim thupuiah an neih.

Arsenal 0-0 Middlesbrough

Arsenal XI: Arsenal: Cech, Bellerin, Mustafi, Koscielny, Monreal, Coquelin, Elneny, Walcott, Ozil, Iwobi, Alexis.

Middlesbrough XI: Boro: Valdes, Barragan, Ayala, Gibson, Friend, De Roon, Clayton, Traore, Forshaw, Ramirez, Negredo.

Arsene Wenger kum 67-na birthday-ah Arsenal player-te'n an pu tan point thum hlawhchhuak ngei tumin an khel a, ball an chang tam nghal hle. Gunners tan Elneny chuan hla deh dawh atangin goal shot a nei a, nimahsela goal sirah a kal chiah chiah. Hmei hnu lawk hian Ozil chuan penalty hmuh beiseiin box chhungah tlu mahse referee Mike Dean-a'n penalty pek tlakah a ngai lo thung.

An mikhualna ramah Middlesborough an che na tan a, Traore chuan goal thun theihna hun tha zet nei mahse ani aia tawnhriat nei tha zawk Cech a paltlang zo tlat lo. Boro lamin an nawr chhunzawm a, box pawn hret atangin Ramirez chuan free-kick tha zetin pet mahse goal kham a per hlauh.

Second half-ah Arsenal an chungnung a, goal pawh an thun nghal teuh hle. Minute 53-naah Valdes chuan Barcelona tana a khelhpui thin Sanchez goal shot tha zetin a dansak a ni. Arsenal midfield-ah Cazorla awm loh a hriat a, a aia lut Elneny-te'n Boro tlarhnugn thiat turin passing fing an nei thei lo.

Arsene-a'n chak ngei tumin Elneny aiah Chamberlain dah lut mahse awmzia a nei thui lo hle. Boro player-te point khatah an lungawi tih a chiang a, goal venhim thupui berah neiin an lamah ball a awm tam hle.

Arsenal tan Sanchez leh Ozil an che thei lo a, mak tak maiin Arsenal player-te'n ball cross an uar hle. Gunners tlarhma player-te an palian lo a, ft 6 kai em pawh an awm lo. Wenger-a'n Giroud a luhtir duh miau loh avangin ball cross nasa hle mahse Boro defender palian Ayala, Gibson leh Friend-te tan ball kangah Arsenal player-te ven hneh an harsa lo.

Hun pek belhah Chamberlain siamsak chu Ozil-a'n pet goal mahse off-side vangin pawm a ni lo thung. Arsenal hian Manchester City point khatin an tlansan a, nimahsela game khatin an khel tam thung. Pep Guardiola naute an khelh hmabaka a an chak a nih chuan Premier League hmahruaitu an ni leh ang.

Arsenal hian Cazorla inhliam an tuar thin hle a, season hmasa pawh khan an khelh that vanglai takin Cazorla an chan a, an che buai tan tiin a sawi theih. Arsenal hian Boro an khelh hma hian game sarih zet an chak zawn hman a, Christmas fixtures tawt lai leh player inhliam tam laiin Arsenal hi an che buai leh mai ang em? London club hian midfielder goal khung thei nei mahse striker goal khung thei an nei tlat lo. Sanchez-te striker position-ah che tha viau thin mahse Arsenal hian Premier League nomawi chawi an duh a nih chuan January transfer-ah striker goal khung thei an lei a ngai ngei ang.

Copyright © inkhel.com 2024. All rights reserved.