Electronics siam that a ngai: Valentino Rossi

09th August 2018, 03:08AM

Valentino Rossi chuan Yamaha chu tan la lehzual tura a duh thu sawiin, tun hnaia an buaina bulpui pakhat electronics lamah insiamthat a ngaih thu a sawi.

Vawi 7 ngawt premier class champion lo ni tawh Valentino Rossi hian 2018 season tan hmaa Yamaha in test an neihna atangin electronics chu an chak lohna a ni tih a hriat tawh thu a sawi a, hun eng emaw chen an tal buai chhan bulpui pakhat a nih thu a sawi a ni.

Kar hmasa khan Czech Grand Prix-ah electronics lamah duhthu an sam lo tih a lang chiah a, Rossi hi qualifying-ah pahnihna niin, intlansiak laihawl velah lap thum chu hma a hruai a, mahse a tawpah chuan palina a ni thei chauh a. Andrea Dovizioso, Jorge Lorenzo leh Marc Marquez te chu a hnu lamah a khan lo hle.

MotoGP chuan 2016 atang khan electronics lampangah khuahkhirhna dan thar an hmang a, manufacturer te’n anmahni duh dan anga software an siam pawh an titawp a. Rossi hian Yamaha elpuite chuan an system chu tlema tunlai lo deuh si, mahse thawk tha em em siin an siam thei bik nia sawiin, hetiang hi an team chuan an ti ve thei tlat lo niin a sawi bawk.

Valentino Rossi chuan, “Yamaha hian spec electronic unit chungchangah tihsual an nei a, works bike leh satellite bike te inkar tihzim nan an duan chhuah a ni a, hei hi Yamaha chuan an ring thlap a. Mahse, team dangte chuan mahni duh anga siam chawp ang deuhin a tih dan an hre bik a. Honda leh Ducati te phei chuan nawr na thei deuh turin an duang chhuak a, Yamaha tih dan hi chu a dam deuh mah mah a ni,” a ti.

Czech Grand Prix kha Yamaha in a zawna race 20 a chak hmel an hmuh lohna a ni tawh a, 1998 hnu lama chak hmel an hmuh loh rei ber a ni ta a. 1996 Australian GP atanga 1998 British GP inkara intlansiak vawi 22 chhung chu Yamaha hian a zawnin chak hmel an lo hmu lo tawh a ni.

Italian rider Rossi chuan amah chu a chak that lai tak a nih thu sawiin, a khawl lampang zawk chu tihchak vat a ngaih thu a sawi.

“Hetiang taka a khalhtu a inbuatsaih that a, a in fit em em laia bike chak lo deuh han khalh hi chu a hahthlak a, a zia lo hle mai a. Midang kan pha lo lutuk a, hetiang hi chuan tih ngaihna a awm lo. Thil thleng thut a ni lo a, intlansiak 20 chhung chak hmel kan hmuh tawh loh avangin a zahthlak tawh zawk a. Ka theihtawp ka chhuah thin a, hei ringawt hi chu a tawk lo deuh a ni,” tiin Rossi hian a sawi.

Copyright © inkhel.com 2024. All rights reserved.