R. Dengthuama Indoor Stadium-a GIG Motors Pro Volleyball League semi final match-ah Electric Veng chuan 3-1 a Durtlang hnehin final an lut ta a ni.
Inrinni zana semi final match hmuhnawm takah Electric Vengin an mamawh hnehna changin GIG Motors Pro Volleyball League final an lut a, 25-20, 21-25, 25-19, 25-17 in Durtlang an hneh.
Preeti Singh chuan Mizorama a inkhelh hmasak berah Electric a chakpui a, point 25 thawk chhuakin 12 hloh mah se LG D3 Player of the Night trophy a dawng nghal.
Hmeichhe team tha pathum inel zingah pahnihna ni chungin Electric an tlang a, league vawi hnih theuh khelin tum khat an chak a, point li an hmu. Final-ah 2-3 a an hneh loh tawh Power Department Sporting Club nen an intum ang.
Electric-in Power hmaah Kolkata atanga an lak luh Preeti an chhawr hman lo va, Durtlang lakah feet 6 leh inchi 2-a sang hian a thawh hlawk. Tuan rang tawk lo mah se ball a vaw nain lak a harsa a, set hmasa berah tum ruk hlap tlain vawi khat a tisual.
Power lakah set la lovin Aizawl district champion Durtlang an tlawm tawh a, final lut turin Electric hmaah chak ngei ngei a tul. Mahse, a bet zawkah an tang zui zel a, set khatna hloh nghalin point 20 bak an hmu hman lo.
Set li an hloh zawn hnuah Durtlangin PVL an khelh chhunga hun duhawm ber an hmang a, captain B Tlangmawii Varte leh Lalremruati Pautu chuan team tanpuiin Electric an nawr tawm. 19-19 atangin an dinhmun an siam a, lehlamin point khat chiah hmuh belhin a vawi khat nan set an la.
Inkhel boruak a nung thar hle a, R Dengthuama Indoor Stadium, Mualpuiah team pahnih tantuten beiseina nen thil thleng zel tur an ngaichang. Rin kai zawk Electric insiam thain team tha leh hlauhawm zawk an nihna an lantir zui thei a, Durtlangin an bei let zo tawh lo.
Hun pawimawhah Electric-in hma lam an pan a, set thumna atangin thawhhona tha zawk nen an khel. Preeti chuan set thumna leh linaah point 15 a hmu a, Durtlang spiker tha Teremi tlahniam ve thungin a tawp set hnihah vawi ruk a vaw tla a, a tir set hnihah point 10 a thawk chhuak.
Captain Lalbiakdiki, Lalmuanpui leh Lalsangzualiten Electric tan tha takin an khel bawk. Durtlangin set thumnaah point 19 hmuin set linaah point 17 bak an thleng zo lo va, tawn hriat leh kawng hrang hrangah an tumpui an pha lo deuh.
Electric tan Muani'n point 10 hmuin 10 tho a hloh a, Sangzuali'n point riat hlawhin point riat a paih bawk. BDI'n point sarih thawk chhuakin vawi ruk a tisual a, player thar Preeti chuan point a thawh hlawk fal.
Durtlang tan mi malin Teremi a che tha a, point 16 hlawhin 11 a hloh. Mi dangin tihsual an ngah a, Tlangmawii'n a point hmuh 11 aia tam 12 a paih a, Lalramengi Ralte leh Lalramliani'n an point hmuh aia tam an hloh bawk.
League khelh hnihah tlawm zawnin Durtlang an tla a, point khat mah hmu lovin set khat an la. Mahse, Mizorama hmeichhe team tha pahnih an el thei viau a, an tan tawn hriat pawimawh tak niin hmasawn zel beiseiawm takin PVL an thlah liam.
FIXTURES
Semi Final (Mipa)
June 13, 2017 (Thawhlehni), 8:00PM
Chhinga Veng v TNT, Muanna Veng
June 14, 2017 (Nilaini), 8:00 PM
Hunthar Veng v Ramhlun Sporting Club
Final (Hmeichhia)
June 16, 2017 (Zirtawpni), 8:00 PM
Power Department Sporting Club v Electric Veng
Final (mipa)
June 20, 2017 (Thawhlehni), 8:00 PM