Nizan atang khan English League Cup khelh tan a ni a, Liverpool chuan Leicester City an tlawh a, si hnih faiin an tlawm, an thla nghal a ni.

Carabao Cup 4th round an luh theih nan hian Foxes tan Islam Slimani leh Shinji Okazaki ten goal an khung. King Power Stadium-a goal hnih lut te hi Liverpool tlarhnung phui loh vang niin a lang bawk.

First half-ah Liverpool hian na takin nawr mahsa goal an khung thei lo, Klopp chuan Solanke, Coutinho leh Chamberlain te chu hmatawngah a dah a, Chamberlain phei chu an inkhel ve tih pawh hriat loh khawpin a club thar tan a che chhia.

Goal hmasa zawk hi 65 mins-a lut a ni a, corner atanga ball kal zel chu Vicente Iborra chuan Okazaki tan tauhin, ani hian box chhung atangin bottom corner-ah a chhuih lut. Goal hnihna a pui hle, 78 mins-a lut a ni a.

Okazaki ball pek chu Islam Slimani chuan mual dinglam sirah a khalh, Liverpool defender ten an um dul dul, box pawn atangin top corner-ah Islam Slimani hian kawh lutukin a pet goal.

September thla chhungin Liverpool hian competition hrang hrangah chak an la nei lo, vawi hnih an tlawm bakah an khingpui vawi hnih an inhnehtawkpui. An game hnuhnung 4-ah Liverpool hian goal 10 an chhuah a, goal 3 an khung.

Inkhelh zawhah Klopp a lawm lo hle, "Khatianga goal kan chhuah kha chu a zialo hle, minti nuam lo rawih thei hial a ni. Khatianga football khelh kha a nih dan tur a ni lo.

"Khan inkhelh dan kha awlsam takin a sawi theih, first half-ah kan khel tha zawk, mahse goal kan khung thei lo, heng hi chu football-a thil thleng thei ve a ni a, chutih laiin goal kan chhuah reng chuan thil hi a hautak zual bik a ni," tiin Klopp chuan a sawi.

Klopp chuan defender a neih that loh a tuar zel chu a ni a, tun nipui bazarah khan Saints defender Virgil van Dijk lak a tum, mahse a thei lo, defender dang a ngaihven zui ta lo kha football pundit ten a pawi tur thu an sawi thin, tunah hian an tuar mek niin a lang.

Inkhel dangah Tottenham chuan si khat faiin Barnsley an hneh a, Alli goal khat hmangin Spurs hian hnehna an chang. West Ham pawhin si thum faiin Bolton an hneh bawk.

EFL Cup Results :

AFC Bournemouth 1 - 0 Brighton & Hove Albion (AET)

Aston Villa 0 - 2 Middlesbrough

Brentford 1 - 3 Norwich City

Bristol City 2 - 0 Stoke City

Burnley 2 - 2 Leeds United (AET)

Crystal Palace 1 - 0 Huddersfield Town

Leicester City 2 - 0 Liverpool

West Ham United 3 - 0 Bolton Wanderers

Wolverhampton Wanderers 1 - 0 Bristol Rovers (AET)

Reading 0 - 2 Swansea City

Tottenham Hotspur 1 - 0 Barnsley