Chinese team Wings Gaming chuan final-ah Digital Chaos hnehin Dota 2 International 2016 champions an ni ta a, $9.1m (India pawisa chuan Rs. 60,88,75,667.59) lai champion team hian an dawng a ni.
August ni 8 atang khan TI6 main event hi tan a ni a, August ni 13 (India hunah chuan August ni 14 zing) khan Seattle Centre-ah Grand Final khelh a ni a, Wings Gaming an champion ta a ni.
Pahnihna Digital Chaos hian $3.4m an hlawh bawk a, The International 2016-ah hian Prize pool $20.7m laiin niin, heng sum tam zawkte hi khawvel pumpuia dota2 gamer-te in-game purchases tling khawm a ni a, eSports-a prize money tam berna a ni lehnghal bawk a ni. The International 2015 khan prize pool kha $18.4m lai a ni a, kumin hian $2.3m in khum a ni ta a ni. Kumin hian a mawng ber 16-na pawhin $103,844 an hlawh kai a, India pawisa chuan Rs. 69,48,141.19 a la ni he mai.
Digital Chaos team-ah hian ram hrang hrang an awm nawk a, Ukraine, Romania, USA, Denmark leh Macedonia-te an ni nawk mai. Kumin March thla khan indin tanin, team lian ten an player thlauhthlakte leh naupang talent nei tha tak takte an ni nawk mai.
TI6 hma hian event lian dangah podium chang phak lo mahse The International 2016-ah hian an rawn lang hlawl mai a, underdogs tia sawi an ni chhunzawm bawk. Hetih lai hian Wings Gaming erawh nikum August thlaa an team lineup ngai ngai khan an rawn inlan leh a, ESL One Manila 2016 leh The Summit 5-ah te an champion avangin TI6-ah hian champion rinkai ber an ni nghe nghe.
TI6-ah pawh upper bracket-ah an awm char char a, vawi khat chiah an tlawm, DC lakah niin, dinhmun thaa an din tawh hnuah an tlawm a nih kha. Lower Bracket-a DC thawn thlak an nih hnuah beisei phak bakin DC an rawn che bon chho leh a. Lower bracket-a an awm ni khatna atangin giant slayers tih an ni nghal. Ropui takin an khel chhova, Grand Final an luh theih nan champion lai Evil Geniuses hnehin, EG hi pathumna an ni ta a ni.
Team pahnihte hian Grand final luh an phu ve ve a, a tu zawk zawk pawh champion mahse an phu kan ti ve ve thei ang. Wings Gaming hi an game a solid a. Tin, an hero an thlan dan hi a sawi lawk theih a ni lova, hei hi an thatna em em pakhat a ni bawk. Grand final-ah hian DC hian best of five game hmasa ber la mahse Wings Gaming hian a zawnin vawi 3 an la a, an champion zui ta a ni.
The International 2016 champions - The Wings Gaming
'Shadow' - Chu Zeyu
'bLink' - Zhou Yang
'Faith_bian' - Zhang Ruida
'Innocence' - Zhang Yiping
'iceice' - Li Peng
Runner-up - Digital Chaos
'Resolut1on' - Roman Fominok
'w33' - Aliwi Omar
'Moo' - David Hull
'Saksa' - Martin Sazdov
'MiSeRy' - Rasmus Filipsen
TI6 Prize sem dan :
1. $9,138,279
2. $3,426,854
3. $2,180,726
4. $1,453,817
5. $934,597
6. $934,597
7. $519,220
8. $519,220
9. $311,532
10. $311,532
11. $311,532
12. $311,532
13. $103,844
14. $103,844
15. $103,844
16. $103,844