Rafael Nadal chuan Wimbledon semi final-a a hmachhawn tur Novak Djokovic chu khelhpui hautak deuh mai a nih thu a sawi a, anni pahnih hi final lut zawk nih tumin Zirtawpni hian an inkhel ang.
World number one Nadal hi All England Club-ah hian 2008 leh 2010 te khan a champion tawh a, hetih lai hian Djokovic chu 2011, 2014 leh 2015 te khan a champion thung a. Anni pahnih hi kum 12 kalta khan Roland Garros-ah an inhmachhawn tan a, vawi 51 an inhmachhawn tawh a, hengah hian Nadal hi 26-25 in a la chungnung chiah a, tun tum hi vawi 52 an inkhelhna a ni ang.
2012 khan Australian Open final-ah an pahnih hian an inkhel a, darkar 5 leh minute 53 an inkhelh hnuah Serbian star Djokovic hi 5-7, 6-4, 6-2, 6-7 (5/7), 7-5 in a chak a, title hi a la a.
A kum lehah Paris khawpuia semi final-ah an pahnih hian an intawng leh a, hetah hian Nadal chuan a hun laia world number 1 Djokovic hi 6-4, 3-6, 6-1, 6-7, 9-7 in a hneh ve thung a, hemi tum hian darkar 4 leh minute 37 zet an inkhel a ni.
Kum 32-a upa Nadal chuan, “Nadal hmachhawn hi chu a hautak thei khawp mai a. He infiamnaah hian player tawh khirh ber pawl a ni a, theihtawp chhuah loh chuan Djokovic hi hneh theih a ni lo,” a ti.
Rafael Nadal hian Grand Slam title 18-na lak ngei a tum hle a, hei hi a puitlin thei a nih chuan quarter final-a Kevin Anderson hneh lotu Roger Federer aia Grand Slam title a lak tlemna hi pahnih chauh a ni tawh ang.
Novak Djokovic hian tournament lian thamah vawi 13 champion theih ngei a tum ve dawn bawk a. 2016 US Open ah pahnihna a ni a, khami hnua a vawi khatna atan Grand Slam semi final a luh leh hmasak ber a ni.
Nikum khan All England Club ah anni pahnih hian an thleng sang lo hle a, Rafael Nadal hian fourth round-ah a khingpui Luxembourg star Gilles Muller a hneh lo a. London khawpuiah hian a hmaa vawi 5 a inlanah vawi 4 chu top 100 pawn lama miin an hneh a ni.
2017 Wimbledon-ah Djokovic hian quarter final a thleng a, a kiu a nat avangin a inhnukdawk a, a hnuah an zai zui nghe nghe a. Hemi hnu hian a tlahniam chak hle a, thla hmasa khan French Open quarter final-ah world number 72 Marco Cecchinato a hneh lo a, ranking-ah 22-naah a tla daih bawk a.
A dinhmun a tleu laklawh avang hian Djokovic chuan Wimbledon-ah pawh tel loh mai chu pawi a tih loh thu a sawi hman hial a, a ranking hi August 2006 hnua a la hniam leh ber tum a ni a. Mahse, kum 31-a upa Djokovic hi Wimbledon-ah chuan a tel ta tho a, semi final hial a thleng zui a, tun tum hi semi final a thlen vawi 8-na a ni.
Quarter final-ah Kei Nishikori a hneh a, Djokovic chuan, “Ka result chu tunhma ang a ni pha lo hle a, chutih rualin Grand Slam hmawr bawk dawna ka awm thin tawh atangin awm dan tur ka hriatthiam theih phah a. Ni tin ka hmaa rawn inchhawp apiang chu muangmarin ka hmachhawn zel mai a ni,” a ti.
Kuminah Nadal chuan quarter final hma kha chuan set a hloh miah lo a, Nilaini khan Juan Martin del Potro nen darkar 4 leh minute 48 zet mai an inkhel a, Nadal chu 7-5, 6-7 (7/9), 4-6, 6-4, 6-4 in a chak a, he inkhelah hian set hnih chu a hloh a ni.
Nadal hian Wimbledon semi final hi vawi 6 a lut ta chiah a, major tournament-ah chuan semi final vawi 28 a luhna a ni tawh.