​Dinthar FC hnehin Police-in MPL6 semi final an khel dawn ta

11th November 2017, 12:11AM

November ni 10, Zirtawpni tlai khan Mizoram Premier League Season 6 Round 13-ah Mizoram Police FC chuan 6-1 laiin Dinthar FC an sawp a, season tan tira khel nawi tak leg relegate lehnghal tura mi rin Mizoram Police FC te chuan Bs-a hovin MPL6 semi final an lut ta a ni.

Dinthar FC erawh table mawngphah an ni chhunzawm zel a, Chanmari West FC results azirin an him theih dan kawng tlem te la awm mahse beisei erawh a bo ta hle mai. Round 4-ah khan team hnihte hi an lo inhmachhawn tawh a, 3-2 in Dinthar FC in hnehna an chang a, an intawn vawi hnihnaah erawh thil a danglam zo ta.

Mizoram Police FC tan Lalfakzuala chuan hattrick a siam a, F Lalrinpuia chuan goal hnih khungin Lalbiakhlua chuan goal khat a khung ve bawk. Dinthar FC tan Samuel Laltlanthanga chuan goal khat a khung ve bawk. Man of the match-ah hattrick siamtu Lalfakzuala Mizoram Police FC chu thlan a ni.

Mizoram Police FC 6-1 Dinthar FC

(F Lalrinpuia 4', 45+2', Lalfakzuala 42', 45', 47', Lalbiakhlua 56') (Samuel Laltlanthanga 15')

Mizoram Police FC hian season laklawh lai atanga enkawltu coach Lalbiaksanga Colney (Bsa) hnuaiah ropui takin an khel chho mek a, khelh khat chiah a awm tawh a, point 20 neiin table-ah pathumna an ni a, point khatin Chanmari FC an lehpel a, top 4 rawn chuh ve thei tur Ramhlun North FC chuan Mizoram Police FC hi an tihbuai theih tawh dawn loh avangin semi final an khel dawn chiang ta a ni.

Dinthar FC hian coach thar Vanlalrova hnuaiah khelh 13 atangin point 8 an nei mek a, table mawngphah an ni, an chung chiahah hian Chanmari West FC awmin 11 points an nei mek a ni.

First half-ah goal nga lai a lut a, a tir atangin Mizoram Police FC chuan inkhel an thunun nghal a, minute 4-ah Fakzuala ball pek fing tak chu F Lalrinpuia (Valpuia) chuan goal-ah a chantir. Dinthar FC pawhin an hun tha neih hmang tangkai ve bawkin minute 15-ah Samuel-a chuan freekick atangin goalkeeper Tanpuia dinglam kilah mawi tak a pet goal a, an siphurh a rul.

Mizoram Police FC chuan first half tawp dawnah goal thum an khung he mai. 42 mins leh 45 mins-ah Fakzuala chuan goal a khung a, added time-ah F Lalrinpuia chuan a goal hnihna a thun belh ve leh a, half time a nih meuh chuan 4-1 laiin Mizoram Police FC chuan hma an hruai.

Second hlaf tan a ni a, Mizoram Police FC chuan goal an khung chhunzawm nghal a, Fakzuala chuan second half tan atanga minute hnihna lekah goal khung lehin hattrick a siam ta. Mizoram Police FC hian an la duhtawk mai lo, 56 mins-ah Biaktea chuan awlsam takin goal a khung ve leh a, 6-1 laiin hnehna an chang ta a ni.

Reporter : PC Lala

Copyright © inkhel.com 2024. All rights reserved.