Heavyweight title kawltu Deontay Wilder chuan Anthony Joshua te’n an chona chu a pawm a, kumin chhungin an inhnek dawn ta a nih hmel hle.

Boxing khawvelin a nghahhlelh em em hi kumin September thla emaw, October thla emaw velah a thleng thei dawn niin a lang tan a, an tih tak tak dawn chuan Joshua chenna ram United Kingdom ah an inhnek ang.

British boxer Anthony Joshua leh American heavyweight boxer Deontay Wilder te hi an incho chho a, pawisa thap tur zat thlengin an sawi fel a, tuna Wilder-a’n chona a pawm takah chuan a tul angte buaipuiin kumin kum tawp lamah chuan an inhnek ngei hmel a ni.

Kum 32-a upa Wilder hian an inhnek a nih chuan $50 million (£37 million) vel chu a hlawh thei dawn a. Kum 28-a upa Joshua sum lakluh theih tur zat hi chu sawi lan a la ni ve chiah lo a. UK ah chuan Joshua hi a lar bawk a, a inhnek entu an thahnem thei hle a. A inhnek hnuhnung pathumah pawh ticket an hralh zo vek hlawm a, Wembley Stadium, London-ah ticket 90,000 an hralh zo a, Principality Stadium, Cardiff-ah vawi hnih chu ticket 78,000 an hralh zo vek bawk a ni.

Anthony Joshua (21-0, 20 KOs) hi 2016 khan world champion a ni a, vawi nga chu a title hi a humhim tawh a, 2017 khan Wladimir Klitschko chu round 10-ah a knock out nghe nghe a, March 31 ah Parker a hneh a, title pathum a kawl theih phah a ni.

Deontay Wilder (40-0, 39 KOs) hi Tuscaloosa, Alabama lam mi a ni a, 2015 khan title a la a, vawi sarih chu a title hi a humhim tawh a, hneh theih loh an tih thin Luis ‘King Kong’ Ortiz chu March 3 khan Barclays Center, Brooklyn, New York ah round 10-naah a knock out a ni.