Dein: Wenger-a'n sawmtu a nei nual ang

23rd April 2018, 08:04PM

Kum 22 kaltaa Arsenal-a Wenger lalut tu David Dein chuan Arsenal manager Arsene Wenger chu free-agent a nih hunah sawm tu a tlakchham loh tur thu a sawi.

(adsbygoogle = window.adsbygoogle || []).push({});

Kar hmasa khan Frenchman hian Gunners chu season tawpah a chhuahsan tur thu a sawi a, kum 22 lai a cham tawhna hmun atang hian a chawl tawh dawn.

Wenger leh Arsenal hian Pathianni khan West Ham 4-1 in an hneh a, match zawha an kawmnaah Wenger chuan Gunners chhuahsan chu thil harsa lutuk tur a nih thu a sawi a; amaherawhchu he hmuna a la cham chhung chuan theihtawp a chhuah tur thu a sawi bawk.

Arsenal vice-chairman ni thin David Dein - 1996-a Wenger thlem luttu - chuan an thawhpui thin hian managerial career la neih belh se a duh thu a sawi a; tin, Wenger chuan Gunners a chhuahsan hnuah sawmtu neuh neuh a neih a rin thu a sawi.

"October thlaah kum 69 a tling tawh dawn a, amaherawhchu a la fit tha hle a ni," tiin Dein hian Sky Sports a hrilh.

"Vawiinniah kan inhmu a, a la hrisel tha hle a ni. A rilru a la tar lo a, a experience tha tak hi chhawrtlak a la ni.

"Club lian tak tak te hming pawh a lo ri ang. Real Madrid, Paris Saint-Germain; England national team pawh hian Wenger ang hi an mamawh a ni.

"Sawmtu a tlachham dawn lo a, mi hrang hrang hnen atangin phone call pawh ka dawng a, Wenger hi biak an duh a ni.

"Club enkawl hna hi a la thawk duh a nih phawt chuan thawh tur a hmu nghal ang," tiin a sawi belh.

Wenger hian North London club hi a chhuahsan hmain hna a la nei nual mai; Arsenal chuan Europa Leauge semi final-ah Atletico Madrid an hmachhawn dawn a; tin, League-ah game 4 khelh tur an la nei bawk a ni.

Copyright © inkhel.com 2024. All rights reserved.