December thlaa lokir tur Djokovic leh Wawrinka

25th October 2017, 01:10AM

Hliam vanga season hmang tluan thei lo Novak Djokovic leh Stanislas Wawrinka chuan December thlaa World Tennis Championship awm turah tel an tum.

Grand Slam-a vawi 12 champion tawh Djokovic hi July thla ațang khan kiu hliam vangin ala chawl char char a, Wimbledon quarter-final-a Tomas Berdych nen an in hmachhawn țumin a khel tluan thei lo va hemi hnu hian a inkhel leh tawh lo.

World Tennis Championship thlirin World No. 7 Djokovic chuan, "Tel tur an hraw hlawm a hei vang hian kir nan leh season bulțanna tura duhthusam a ni." tiin a sawi.

Stan Wawrinka pawhin World Tennis Championship hi a hliam hnua kir leh nan a hmang dawn a, French Open finalist hi khup hliam vangin August thla ațang khan a inkhel leh tawh lo.

Kum 32 mi wawrinka chuan, "Ka dam chho zel a court-a kir leh hun ka nghakhlel khawp mai. Ka team-te nen kan țangrual a dam fel hlan ka nghakhlel hle." tiin a sawi.

Abu Dhabi-a nghah tur World Tennis Championship hi Australian Open țan hma kar hnih la awma khelh tur a ni a, Djokovic leh Wawrinka-te bakah hian Rafael Nadal, Dominic Thiem, Pablo Carreno Busta leh Milos Raonic-te pawh tel tum zingah an tel ve bawk a ni.

Copyright © inkhel.com 2024. All rights reserved.