​Dawngtea goal hnih hmangin Chhinga Veng FC-in Bethlehem Vengthlang FC an hneh

20th September 2017, 12:09AM

Chhinga Veng FC hian kumin an hmang tha hle a, Mizoram Premier League season 6-ah pawh bul an tan tha tak zet, hneh loh an la tawng lova, game li khel tawhin vawi thum an chak a, vawi khat draw an nei a ni.

September ni 19, 2017 (Thawhlehni) chawhnu khan Bethlehem Vengthlang FC si hnih faiin an hneh a, MS Dawnglian chuan goal hnih khungin man of the match-a thlan a ni bawk.

Chhinga Veng FC 2-0 Bethlehem Vengthlang FC

(MS Dawngliana 45', 64')

Chhinga Veng FC XI : T. Mawia, Hmingtea, Rinchhana, Awmpuia, Dinliana, Msa, Rinchhana, Dingngheta, Lawma, Apuia, Dawngtea

Bethlehem Vengthlang FC XI : Mama, Dina Varte, Ramenga, B. Thara, Tluanga, Valtea, Zuia Hnamte, Dinpuia, VL Thanga, Malsawma, Rammawia

Chhinga Veng FC hian coach Lalsangzuala Hmar hnuaiah Mizoram Police 4-1 in an hneh a, Chanmari FC 3-0 in an hneh bawk, Aizawl FC nen erawh 2-2 in a inhnehtawk a, Bethlehem Vengthlang FC 2-0 in vawiin khan an hneh leh bawk a, khelh 4 atangin point 10 an hlawhchhuak a, table hmahruaitu an ni mek.

Bethlehem Vengthlang FC coach Chawngthansanga chu hrem a nih avangin a naute a ho thei lo, hei vang hian Chhinga Veng FC an hmachhawn tum pawh hian an duhthusamin an khel thei ta lo a ni. Tun season-ah Bethlehem Vengthlang FC hi an vawikhat tlawmna a ni a, Chanmari West FC 2-1 in an hneh, Mizoram Police FC nen 1-1 in an inhnehtawk a, Dinthar FC nen 2-2 in an inhnehtawk bawk, khelh li atangin point 5 an nei mek a ni.

Goal hmasa zawk hi first half tawp dawn 45 mins-a lut a ni a, Vanlallawma shot tha zet chu a goal dawn nia a lan laiin Bethlehem Vengthlang FC goal bar a per, hemi per hi awlsam takin Dawngtea chuan a ti goal. Goal hnihna hi second half tir lam 64 mins-a lut a ni a, Dampuia leh Rinchhana thawhrah sengin Dawngtea chuan a goal hnihna a khung.

He match-ah hian Chhinga Veng FC an khel tha hle a, goal dang khungna chance pawh an nei nual, Khawpuimawia chuan goal a khung teuh hle, a volley tha zet chuan Bethlehem Vengthlang FC goal kham a per dawp nghe nghe a ni. Bethlehem Vengthlang FC pawhin chance an nei nual tho, Rammawia, Dina Varte leh B. Thara ten an chance neih an hmang tangkai lo, Chhinga Veng FC goalkeeper T. Mawia a khel tha hle bawk a, Rammawia shot a lo dan phei chu tha tak a ni.

Bethlehem Vengthlang FC hian September ni 22, Zirtawpni tlai dar 3:00-ah Ramhlun North FC an hmachhawn leh ang a, Chhinga Veng FC hian Zirtawpni zan dar 7:30-ah Chanmari FC an hmachhawn bawk ang.

Reporter : PC Lala

Copyright © inkhel.com 2024. All rights reserved.