09 Apr 2017 04:45

Serchhip Chelsea

David Beckham chanchin

England national team captain hlui David Beckham hi hre lo kan awm lo tih a chiang a, a vanglaia freekick pet thiam ber ni a an sawi țhin hian a hringnunah sawisel tur a nei tam lo.

Mi nun tluang anih bakah hmangaihna kawngah pawh a a entawn tlak a, khelmuala a che vel mai nilo khelmual pawn lama a nun pawhin mi tam tak a hneh.

A HUN HMALAM:

Kum 1975 May ni khan England khawpui London-a Whipps Cross University Hospital-ah alo piang a, a hmingpum chu David Robert Joseph Beckham a ni.

A naupan tet ațanga football ngaina mi a ni a, Ridgeway Park-ah football regular taka khelin Chase Lane Primary School leh Chingford County High School-ahte a kal pah reng bawk.

A nu leh pate hi Manchester United țantu ruh tak an ni a, London ațangin Manchester-ah an team-te inkhel en turin an zin vang vang țhin a Beckham hi an hruai țhin bawk.

Beckham pawh hian a naupan tet ațangin Manchester United a țan ve hle a, football lo chu engdang mah atchilh a nei ngailo. Manchester-a Bobby Charlton football school-ah te kal chhoin a in zir zel a Bobby Charlton football school-a a awmlai hian FC Barcelona hnenah training nei turin thlan a ni.

A len deuh hnu chuan an khaw team Ridgeway Rovers-ah a khelzui a he team hi a pa Stuart Underwood leh Steve Kirby-te enkawl a ni a kum 1986 khan Beckham hi Manchester United leh West Ham United inkhel țumin mascot-ah hman a ni.

Naupang hmel felfai tak ni țhin Beckham hian Leyton Orient leh Norwich City-ah te luh tumin enchhinna (trial) a nei a, Tottenham Hotspur-in an din School of Excellence-ah ah pawh a kal țhin.

Brimsdown Rovers youth team-ah kum hnih a khel a, kum 1990 khan Under-15 Player of the Year-ah thlan a ni a Bradenton Preparatory Academy-ah pawh a in zir ve fo bawk.

PROFESSIONAL HUANGAH A LUT:

Kum 14 a tlinna pianchamah tak Manchester United school boy form a ziak fel (signed) a, kum 1991 July ni 8 khan Youth Training Scheme tan contract a ziak.

Manchester United youth team-ah hian Ryan Giggs, Gary Neville leh Paul Scholes-te pawh an awm ve a an coach chu Eric Harrison niin kum 1992 May thla khan FA Youth Cup-ah an champion.

Manchester United senior team tan a game hmasa ber chu kum 1992 September ni 23 khan League Cup-a Brighton & Hove Albion an hmachhawn țumin a khel a, kum 1993 January ni 23-ah contract puitling (professional contract) an ziahpui.

Kum 1994 December ni 7-ah Manchester United tan hian UEFA Champions League-a a game hmasa ber chu Turkish club Galatasary an mikhual țumin a khel a, 4-0 in an chak a Beckham hian goal khat a khung ve nghe nghe.

* Preston North End: Kum 1994–95 season khan Preston North End-ah hian loan-in a khelchhuak a, game nga khelin goal hnih a khung a corner kick ațangin vawikhat a pet goal.

* Manchester United: Kum 1995-1996 season-ah chuan a club diktak hian an kokir a, Premier League-ah Manchester United tan hian a game hmasa ber chu kum 1995 April ni 2 khan Leeds United nen goal inpe lo va an inhnehtawk țumin a khel.

Hetih hunlaia Manchester United manager Sir Alex Ferguson chuan a player naupang zawkteah rinna a nghat ngam a, an thiamna a hrechiang bawk. "Fergie's Fledglings" an tih mai Ferguson-a'n player naupang tete a thlan zingah Beckham pawh a tel a Nicky Butt, Gary Neville leh Phil Neville-te pawh an tel ve bawk.

Kum 1994-1995 season tawpah player upa lam ni tawh Paul Ince, Mark Hughes leh Andrei Kanchelskis-te'n Manchester United an chhuahsan a player lar zawk lei lovin player naupang zawkte chhawr mai an thlang a sawiselna an tawk nasa hle.

Red Devils hian league-a an game hmasa berah 3-1 in Aston Villa an hnehlo nghal a, mahse in siamțhain hemi season hian Premier League leh FA Cup-ah te an champion kawp a, hei hi Beckham-a'n Manchester United a champion puina hmasa pahnih a ni bawk.

Kum 1996–97 season țan hma deuhin David Beckham hi Mark Hughes hak țhin Jersey Number 10 ha turin tih a ni a, kum 1996 August ni 17-ah league-a an game hmasa ber khelin Beckham hian goal ropui leh nalh tak a khung.

He inkhelah hian Wimbledon an hmachhawn a, Beckham hian Wimbledon goalkeeper Neil Sullivan lo tlanchhuak hmuin khelmual lai vel ațangin mawi takin a pet goal.

Kum 1996–97 season hian Premier League-ah an champion chhunzawm leh a, Beckham hi PFA Young Player of the Year-ah thlan a ni.

Kum 1997 May ni 18 khan Eric Cantona chuan football khelh a chawlhsan a, a jerser number hak țhin 7 a chuang a Manchester United hian Tottenham ațangin Teddy Sheringham an lalut ve bawk. Number 10 ha mektu Beckham hian Sheringham hi number 10 a kian a number 7 hak a thlang.

Manchester United jersey number 7 hi George Best, Bryan Robson leh Eric Cantona-te'n an lo ha lar tawh țhin a, an hlawhtlinpui hle bawk. Beckham pawh hian a ha lar zui viau a hemi hnu hian Cristiano Ronaldo chuan alo ha lar veleh.

1998–99 season khan Manchester United hi Premier League, FA Cup leh Champions League-ah te an champion vek a, English team dangte la tih theih ngailoh 'Treble Champion' an ni.

1998-1999 season-a chetțhat vang hian kum 1999 khan European Footballer of the Year leh FIFA World Player of the Year dawng thei turin thlan chhuah a ni a, mahse Brazilian striker Rivaldo a tluk ta lo va pahnihna (runner-up) a ni.

Kum 2000 tir lam khan an manager Ferguson nen an inkarah buaina an nei chho va, training-naah a kal lo va hei vang hian a kar hnih hlawh £50,000 chawitirin hetih hunlaia an hmelma Leeds United an hmachhawn țum pawhin squad-ah Beckham hi a tel lo.

Kum 2000-2001 season-ah hian Premier League-ah a zawna a vawithum nan an champion leh a, Beckham hi an player pawimawh ber pawl chu a ni reng tho va hemi season hian goal kua a khung bawk.

Kum 2001-2002 season-ah Premier League nomawi an kawllai Arsenal-in an chhuhsak a, kum 2002 April ni 10-ah Beckham hi Champions League-a Deportivo La Coruña nen an inkhel țumin a inhliam a hemi hnu hian he season hi a khel leh ta lo.

Manchester United hi season dangin che țha lo mahse mimal tak chuan Beckham hi a che țha thung a, intihsiakna hrang hrangah game 42 khelin goal 16 a khung a Premier League-ah bik chuan goal 11 a khung.

Kum 2002–03 season tir lamah hliamin a tlakbuak a Ole Gunnar Solskjær chuan a dinhmun alo luahlan bawk nen manager leh an inkar pawh a țha lo chho tial tial.

Kum 2003 February ni 15 khan FA Cup-ah Arsenal an hnehloh a, Alex Ferguson thinrimin ball boot a pet vaka hei hian Beckham mitkoah fuin țhui (stich) a ngai hial a. He thil thleng vang hian manager nen an inkar khi hi a zauh phah hle niin an sawi.

Season bulțan țha lo mahse Premier League-ah an champion leh ta tho va, Beckham hian game 52 khelin goal 11 a khung a England player rinrawl a ni pha reng bawk.

Kum 2003 June ni 13 khan Officer of the Most Excellent Order of the British Empire (OBE) hlan a ni.

Beckham hian Premier League-ah Manchester United tan game 265 khelin goal pawh vawi 61 a khung a, Champions League-ah game 81 khelin goal 15 a khung bawk.

Kum 12 a awm chhungin Manchester United hi Premier League nomawi vawiruk a chawipui a, FA Cup nomawi vawihnih chawipui bawkin European Cup, Intercontinental Cup leh FA Youth Cup nomawi vawikhat țheuh a chawipui bawk a ni.

* Real Madrid:

Kum 2003 nipui transfer laiin Manchester United hian Beckham hi Spanish club Barcelona hnenah an hralh ngei dawn niin a lang hman a, mahse Real Madrid-in €35m sengin an lalut ta zawk a kum li daih contract an ziahpui a July ni 1-ah an lalut fel.

Real Madrid-ah hian jersey number 7 a chang lo va, hetih laia an captain Raul Gonzalez chuan No. 7 hi a ha a Beckham hian Basketballer ropui ni țhin Michael Jordan hak țhin ang zat jersey number 23 a ha ta thung.

Zinedine Zidane, Ronaldo, Luis Figo, Roberto Carlos, Raúl leh Iker Casillas-te nen Spanish club-ah hian an khel ho va, mahse English midfielder hian khelhna hmun a chang tam vak lo.

Kum 2003 leh 2007 inkar khan Real Madrid-ah hian a khel a, kum 2006-2007 season khan La Liga-ah an champion a kum 2003 khan Supercopa de Espana-ah an champion bawk.

* Los Angeles Galaxy:

Real Madrid player anih laiin thovin Major League Soccer (MLS) club hi kum 2007 January ni 11 khan a zawm dawn tih chian a ni a khawvel a dengchhuak nghal.

Hemi kum April thlaah a nupui Victoria nen Beverly Hills-ah $18.2m sengin in an lei a, July thlaah LA Galaxy hi a zawm fel.

A club thar tan hian a game hmasa ber chu World Series of Soccer-a Chelsea nen an inkhelh țumin a khel a, minute 78-naah Alan Gordon thlakin a lut.

He inkhel hi milar - Tom Cruise, Katie Holmes, Eva Longoria, Mary-Kate Olsen, governor Arnold Schwarzenegger, Jennifer Love Hewitt, Alicia Silverstone leh Drew Carey-te pawhin an khelhna (Home Depot Center)-ah an en a ESPN chuan live-in an pechhuak.

* AC Milan:

Kum 2009 January thla khan Beckham hian loan-in Italian club Milan a zawm dawn tih puan a ni a, March thla thleng daih tura in remna siam ni mahse a hnuah July thla thleng atan pawhsei leh a ni a MLS season pawh bul a țan lo.

* Los Angeles Galaxy-ah a kir:

A club pangngaia a kir leh tirh hian Galaxy fans-te'n an lawm lo hle a, season chawhma lam tawp a khelhloh vangin an lungawi lo.

kum 2009 hian MLS Western Conference final a luhpui a an palyer pawimawh pawh ni zuiin final-ah hian Real Salt Lake an hnehloh.

* AC Milan-ah loan bawkin:

Kum 2009 November thla khan Major League Soccer (MLS) season a tawp hnuin loan-a a lo khelh tawhna Milan-ah bawk loan-in a lut leh dawn tih puan a ni a, kum 2010 January thlaah Milan-ah hian a lut fel.

Chievo Verona nen an inkhel țumin hliam a nei a Milan hian vawi tam pawh an chhawr hman hmain thla nga chhung chawlh a mamawh a MLS season pawh a khel thei lo.

* Los Angeles Galaxy-a a kir vawihnihna:

Kum 2010 September ni 11 khan LA Galaxy tan a khel leh țan thei a, 3-1 a Columbus Crew an hneh țumin a kir leh hnua a game hmasa ber hi a khel a hemi season hian Western Conference leh MLS Supporters Shield-ah te an champion.

LA Galaxy hi MLS Cup-ah kum 2011 leh 2012-ah a champion pui bawk a, kum 2012 MLS Cup Final an khelh hmain Beckham hian he inkhelh hi kum khat daih contract la nei mahse LA Galaxy tan a game hnuhnung ber anih tur thu a sawilawk.

* Paris Saint-Germain (PSG):

Kum 2013 January ni 31 khan French club PSG hian an lalut a, a game hmasa ber chu February ni 24-ah khelin Marseille an mikhual țumin a khel a hemi season-ah hian French Ligue 1-ah an champion.

kum 2012–2013 season kal mek lai, May ni 16-ah Beckham hian season tawpah football khelh a chawlhsan dawn tih a sawi a, ni hniah liam hnuin Brest an mikhual a 3-1 a hnehin Beckham hian PSG tan a game hnuhnung ber a khel.

He inkhelah hian minute 80-naah Beckham hi thlak a ni a, mittui nen lungchhe takin khelmual a chhuahsan.

* England:

United Nations Children's Fund (UNICEF) tana Goodwill Ambassador ni mek Beckham hian England national team tan a game hmasa ber chu kum 1996 September ni 1 khan World Cup qualifying round-a Moldova an hmachhawn țumin a khel a, team captain pawh a hnuah a ni chho ta bawk.

Three Lions tan hian kum 1996 leh 2009 inkar khan game 115 khelin goal 17 a khung a, Peter Shilton tihlohah chuan England tana khel hnem ber ala ni.

* SULHNU SAWISEL BO A HNUTCHHIAH BIK LO:

Beckham hi England player player zinga Red Card vawihnih hmu thei hmasa ber a ni a, pakhat zawk phei hi chu a lar vet vet hle.

Kum 1998 World Cup khan Round of 16-a Argentina nen an in hmachhawn țumin Argentina midfielder Diego Simeone tlu tawh a pet lui a, hei vang hian hnawhchhuah niin demna pawh a tawk nasa hle. Beckham-a'n Red Card a hmuhna Simeone hi tuna Spanish club Atletico Madrid manager ni mek hi a ni nghe nghe.

Kum li chhung chauh Real Madrid-a a khelh chhungin Yellow Card vawi 41 a hmu hman a, Red Card vawili a hmu hman bawk a Red Card a hmuhna hi La Liga-ah vek a ni.

Paris Saint-Germain (PSG)-a a khel chhungin vawikhat hnawhchhuah a ni bawk a, a hun pumpuiah England, Milan, LA Galaxy, Manchester United, Real Madrid leh PSG tan game 420 a khel hman a Red Card vawisarih hmuin game 60 dana Red Card hmu ziah ang a ni leh bawk.

# RECORD A SIAMTE:

* English player zinga ram hrang hrang league palia champion trophy chawi thei hmasa ber (England, Spain, United States, France)

* England player zingah FIFA World Cup țum thuma goal khung thei hmasa ber.

* British footballer zinga Champions League game za (100) khel tling thei hmasa ber.

# MIMALA CHAWIMAWINA A DAWNTE:

* FIFA World Player of the Year : Silver Award (1999, 2001)

* 1999 Ballon d'Or : Silver Award

* Premier League Player of the Month: August, 1996

* PFA Young Player of the Year: 1996–97

* FWA Tribute Award: 2008

* Sir Matt Busby Player of the Year: 1996–97

* England Player of the Year: 2003

* UEFA Club Footballer of the Year: 1998–99

* UEFA Club Midfielder of the Year: 1998–99

* Premier League 10 Seasons Awards (1992–93 to 2001–02):

* Domestic & Overall Team of the Decade

* Goal of the Decade (vs. Wimbledon, 17 August 1996)

* BBC Sports Personality of the Year: 2001

* UEFA Team of the Year: 2001, 2003

* Officer of the Order of the British Empire: 2013

* Real Madrid Player of the Year: 2005–2006

* PFA Team of the Year (4): 1996–97,1997–98,1998–99,1999–2000

* FIFA 100

* ESPY Award – Best Male Soccer Player: 2004

* ESPY Award – Best MLS Player: 2008, 2012

* English Football Hall of Fame: 2008

* BBC Sports Personality of the Year Lifetime Achievement Award: 2010

* MLS Comeback Player of the Year Award: 2011

* PFA Team of the Century (1997–2007)

* Gold Blue Peter Badge winner, 2001

* Do Something Athlete Award, 2011