Chhuah a dil hnua Juventus-in an chhuah zalen tak Brazilian right-back kum 34 mi Dani Alves chuan nipui chawlh a hmang mek a, rethei taka a seilenna khua Juazeiro tlawhin a hlim hle nghe nghe a ni.

Barcelona defender hlui Dani hian nilaini khan a pian leh murna Brazil hmarchhak thingtlang khua Juazeiro a tlawh a, khum dup pawh nei lova concrete khum chang taka an mut thinna hmun te chu tlawhin, ke lawnga an inkhelhna hmunte chu chhuang takin thlalak a pholang a ni.

Dani Alves chuan inkhelh a zirna hmun leicharah ngei chuan Barcelona-a a thiante pahnih Messi leh Neymar enge an an tih hriat a chak thu fiamthuin a sawi nghe nghe.

"Juventus stadium, Camp Nou, Bernabeu leh Emirates vela goal hnih khat khungte chu a awlsam alawm. He kan inkhelh thinna hmunah hian lo khel ve chhin teh u, goal hnih khat in khung thei ngut ange maw?

"Messi leh Neymar te hi lung nawi kar vela an inkhel ka hmu chak khawp mai, Ball in thiam viau a ni thei, mahse ka seilenna field-ah hi chuan enge in an ang aw?" tiin Dani Alves chuan a sawi.

A thian hluiten concrete in sak tumin lei an lo lai a, Dani Alves hian a laihpui ve nghal lawp lawp bawk a. Tin, an tui in thinna hmunah ngei chuan an tih thin dan angin tui a malsawm zawh chuan a in a. Chhungkaw rethei tak atanga chawr chhuak; tuna khawvela footballer hlawhtling ber zing ami ni ta Dani chuan,

"Mi tuarchhel tan lo chuan hringnunah hian damkhawchhuahna a awm lo. Hlim taka ka tualchaina hmun ka tlawh leh a, sum leh chawimawina hi ka mamawh a ni lo. Hriselna tha, khum tha, mutna dup leh hmasawn tumna thinlung ka neih chuan ka duh tawk hle." tiin a sawi.

Juventus-in an chhuah zalen takah chuan Barcelona-a a pu hlui Pep Guardiola team Manchester City a pan mai dawn nitea sawi a ni a, tunah kum 34 mi niin kum hnih khat chu tha takin a la khel thei dawn a, club lian a zawm ngei a rinawm a ni.