October ni 23, Thawtanni zan khan Mizoram Premier League Season 6 Phase 2 Round 10 Dinthar FC leh Chhinga Veng FC ten an khel a, Chhinga Veng FC chuan 3-2 in Dinthar FC an hneh.
He inkhelah hian goal nga lai a lut a, Chhinga Veng FC tan R Malsawmtluanga, Lalrammuanpuia leh Laldampuia te goal khat theuh an khung a, Dinthar FC tan Lalbiakhlua leh Samuel Laltlanthanga chuan goal khat ve ve an khung bawk. Man of the match-ah Chhinga Veng FC midfielder R Malsawmtlauanga chu thlan a ni.
Phase 1 Round 7-ah Chhinga Veng FC hian 3-1 in Dinthar FC an hneh tawh a, an in tawn vawi hnihnaah hnehna an chang nawn leh a ni.
Dinthar FC 2-3 Chhinga Veng FC
(Lalbiakhlua 70', Samuel Laltlanthanga 74') (R. Malsawmtluanga 10', Lalrammuanpuia 45', Laldampuia 52')
Dinthar FC hian coach thar Vanlalrova hnuaiah Lungleiah hnehna chang nghal mahse, an match hnuhnung berah Ramhlun North an hneh loh hnuah Dinthar an hneh lo leh bawk. Liberian striker Jackson Victor Ogheneochuko leh midfielder Clarence Carter Ezebube ten inkhel bul tan mahse, hnehna an chang zo lo. Khelh tawhah vawi hnih hnehna chang tawhin vawi ruk an tlawm tawh a, vawi hnih draw an nei a, point 8 nei mek a ni.
Chhinga Veng FC hian coach Lalsangzuala hnuaiah hneh loh an la nei lo a, foreigner pahnih defender Lassi Adeyemi leh midfielder Olumide Olawale chuan bul an tan ve ve a, hnehna changin khelh tawhah point 26 an nei tawh a, hmahruaitu an ni chhunzawm zel a ni.
Inkhel tan a ni a, Chhinga Veng FC chuan inkhel thunun zawkin minute 10-ah mual dinglam sir a tang a VL Lawma ball pek tha zet chu MS Tluanga chuan chiang zet a pet goal-in an hmahruaina a khung nghal.
DintharFC tan Liberian striker Jackson Victor Ogheneochuko chuan vawi thum zet goal thunna hun tha a hlah thung.
Chhinga Veng FC chuan hun tha nei leh in Dampuia goal shoot tha zet leh MS Tluanga freekick tha zet chu Dinthar FC keeper Mala Hauhnar chuan a dan sak thung a, huntawp dawn injury time-ah Sawmfela thawhrah sengin Lalrammuanpuia (Apuia) chuan an goal hnihna a khung.
Second half-ah Chhinga Veng FC chuan nawr nghalin minute 52-ah mual dinglam sir a tang a, Lalrammuanpuia (Apuia) ball vawrh luh tha zet chu Dampuia chuan goal-ah chan tirin an goal thumna a khung leh bawk.
Dinthar FC tan Samuel Laltlanthanga luh tir a ni a, an goal nawr na sawtin minute 70-ah Samuel-a freekick tha zet chu Biakhlua chuan goal-ah chan tirin an goal khatna a khung a, minute 4 aral leh hmain Samuel-a chuan freekick a tangin an goal hnihna a khung zui zat bawk.
Huntawp dawnah Dinthar FC midfielder Clarence Carter Ezebube chu hnawh chhuah a ni. An siphurh sutna hun tha nei nual mahse goal erawh an thun mai thei tawh lo a, Chhinga Veng FC coach Sangzuala Hmar pawh technical area a tang a hnawh chhuah a ni a, goal thun belhna hun tha nei ve bawk mahse goal erawh an thun belh thei tawh lo a, 3-2 in hnehna an chang ta a ni.
Chhinga Veng FC hian October ni 26, Ningani tlai dar 3:00-ah Aizawl FC an hmachhawn ang a, zan dar 7:30-ah Dinthar FC hian Bethlehem Vengthlang FC an hmachhawn thung ang.
(adsbygoogle = window.adsbygoogle || []).push({});