12 Jan 2018 11:53

Inkhel

Mizo Sports Website hmasa ber

​Conte-a'n Chelsea chhuahsan a tum?

Zirtawpni Press Conference-ah Chelsea manager Antonio Conte chuan Chelsea chhuahsan thei dinhmuna a din reng thu a sawi chhuak tlat mai.

Kum 48 mi Conte hi Paris St-Germain chuan lak an tum dawn niin thuthang a awm mek a, hetih lai hian Chelsea-a a hna pawh Premier League manager tu emaw berin a luahlan dawn nitea sawi a awm bawk.

Kum 2019 June thla thleng Stamford Bridge-ah contract a nei a, hetih lai hian Conte chuan, "Ka cham chhunzawm thei a, midang pawhin ka hmun hi min luahlan thei reng bawk. Manager nih chuan hetiang boruak hi kan tawn tur chu a ni reng a ni," tiin a sawi.

Transfer bazarah a chetha tawk lo nia a lan avangin a season khatnaah League title la mahse Chelsea hotute mit a tlung chiah lo nia sawi a ni. Tunah hian Premier League hmahruaitu Manchester City chu point 16 in an thlau mek. Tun season tir atang khan pressure sang tak a tawng chho reng a ni.

"Hetiang boruak hi chu ka tawng hnem tawh a, chutih laiin thil danglam tak erawh ka tawng tlat mai. Tun season kan match hmasa bera Burnley kan hneh loh tum khan chanchinbumite chuan ka ban theih nan min nawr kha a ni a.

"Club dangah chuan hetiang hi a thleng ngai lo, hetiang thilah hi chuan club-in thutlukna a siam anga, min hnawtchhuak thei reng tih hi ka ring tlat a ni," tiin Conte chuan a sawi bawk.