Coach thar hnuaiah Chanmari West FC an chak nghal

25th October 2017, 04:10AM

October ni 24, Thawhlehni zan khan Mizoram Premier League Season 6 Phase 2 Round 10 match hnuhnung ber Chanmari Derby inkhelah Chanmari West FC chuan 2-1 in Chanmari FC an hneh a, Chanmari West FC defender H. Lalhlimpuia chu Man of the match-ah thlan a ni.

Phase 1 Round 7-ah team pahnih te hi 1-1 in inhneh tawk mahse, an in tawn vawi hnihnaah erawh Chanmari West an chak. Chanmari West FC tan Lalramluaha leh Benjamin Cooper  chuan goal khat ve ve an khung a, Chanmari FC tan Thasiama chuan goal khat a khung ve bawk. 

Chanmari FC 1-2 Chanmari West FC

(Thasiama 52') (Lalramluaha 6', Benjamin Cooper 38')  

Chanmari FC hian Nigerian defender Emmanuel la lutin second half-ah luh tir a ni a, hnehna an chang lo. Coach Vanlalthlanga hnuaiah vawi thum hnehna chang tawhin vawi thun draw neiin vawi li an tlawm thung a, point 12 neiin table-ah palina an hauh mek a ni.

Chanmari West FC hian coach HC Zarzoliana thlak nan an veng tlangval H Lalnunzira an la lut a,  hnehna an chang nghal. Khelh tawhah vawi thum hnehna chang tawhin vawi nga an tlawm tawh a, vawi 2 draw nei tawhin point 11 an nei a,  table mawngphah an chhuah san rih a ni.

Inkhel tan a ni a, Chanmari West chuan inkhel thunun nghalin minute 6-ah goal an khung nghal a,  he goal hi Jacob-a corner pet Chanmari FC defender Joseph-a'n Ramluaha a pet per ball kal let hi a goal ta a ni. 

Chanmari West FC chuan nawr chhunzawmin Duata chuan goal thun belhna hun tha a hlah a, Liberian striker Benjamin Cooper chuan vawi hnih ngawt goal thunna hun tha a hlah ve bawk. Minute 38-ah defender Vanlalnghenga ball vawrh luh chu striker Benjamin Cooper chuan box-ah la lutin an goal hnihna a khung.

Chanmari FC huan first half huntawp dawnah goal thunna hun tha neiin Thasiama chuan Chanmari West FC keeper Malsawma Hmar chiah a hmachhawn hnuah defender Vanlalnghenga chuan a dang hman hlauh.

 Second half-ah Chanmari FC insiam thain minute 52-ah Thasiama chuan an goal khatna a khung. An siphurh sut ngei tumin MC Malsawmzuala, Mabiaa leh Nigerian defender Emmanuel Chijioke Igwebuike luh tir an ni a, an goal bawh a na sawt bawk. Thomas-a chuan goal thunna hun tha a hlah hnuah Pune FC striker Gani chuan goal kham a pet per dawp bawk.
 

Goal thun belh tumin Chanmari West coach H Lalnunzira chuan Lalengmawia luh tirin huntawp dawnah Lalengmawia chuan goal thun belhna hun tha a hlah a, hun a tawp zui ta a ni.

 October ni 27, Zirtawp tlai dar 3:00-ah Chanmari West FC hian Ramhlun North FC an hmachhawn ang a, zan dar 7:30-ah Chanmari FC hian Mizoram Police FC an hmachhawn thung ang.

(adsbygoogle = window.adsbygoogle || []).push({});

Copyright © inkhel.com 2024. All rights reserved.