Pathianni zing khan Chicago, Illinois-ah UFC event neih a ni a, hetah hian WWE Champion hlui CM Punk-a chu mipui tam tak hmaah chak ngei tumin a inlan a, a pianna khua anih angin amah tantu an thahnem hle a, nimahsela vanduai thlak takin Mike Jackson-a lakah unanimous decision-in a chaklo hlauh a, UFC President Dana White-a chuan post fight interview-ah CM Punk-a UFC zinkawng a tawp thu a sawi zui nghal bawk.

WWE Champion hlui CM Punk-a hi UFC-a a khelh hmasak berin Mickey Gall-a lakah first round submission-in a chaklo a, hemi hnu hian training a nei chhunzawm leh nghal char char a, UFC fight a neih leh hunah chuan chak ngei tuma a inbuatsaih laiin a vanduai ta hlauh maia, hemi fight a neih zawh hian damdawi in lamah phur nghal niin; khawvel entertainer ropui CM Punk-a UFC khelh hnuhnun ber a ni zui bawk.

UFC bika a khelh hma hian fighter tam takin an sawisel nasa hle a, UFC fighter tam tak phei chuan circus intihsiakna ang hialin an ngaihdan an sawi chhuak CM Punk-a MMA khel tur tih thawm a awm veleh fighter tam tak mak tih a hlawh a, lungawilo pawh an tam hle. Mixed Martial Arts lama tawnhriat neih chu sawiloh; contact sport engmah khel ngai lovin khawvel infiamna hautak ber huanga a zuang lut mai hian mak tih a hlawh a, UFC sawiselna a nasa zui hle a nih kha.

WWE Champion hlui Phil Brooks-a(CM Punk) hian WWE lama luh a tum tawhloh thu a sawi chamchi a, nimahsela WWE lamin sum thahnem takin lo sawm ta sela, WWE ring chhungah a inlan leh lovang tih hi a sawi ngawt theihloh. Tun dinhmunah erawh WWE lam a hawi tawhlo hle a, amaherawhchu Wrestling Organisation dang Ring Of Honour leh TNA lamah chuan a la inlan mai thei bawk. MMA huangah hnehna a changlo a ni mai thei, a huaisenna leh a tumruhna erawh hmuh hmaih chi a ni awm lo e.