Chelsea manager Antonio Conte chuan si li faia West Brom an hneh hnuin an khelhdanah a lungawi tih a sawi a, Premier League-a hmahruai mektu Manchester City umphak an har tawhin a ring bawk.
Conte leh a naute hian Inrinni zan khan Hawthorns-ah West Brom luhkhungin Eden Hazard chuan goal hnih a khung a, Alvaro Morata leh Marcos Alonso-te'n goal khat ve ve an khung bawk.
Inkhel zawh hnua Sky Sports-in an kawmnaah Conte chuan, "Lawm tur kan ni a, a chhan chu kan khelh dan a dik a kan khel țha hle. Tun inkhel kha awlsam mahse season liamta khan West Brom kan hmachhawnna game hnihah game hautak kan hmachhawn."
"Tun season-ah West Brom inkhel hi ka en hnem em em a point tam zawk hmuh phu ni pawhin ka hria, mahse tun țum inkhelah kha chuan kan hneh zawkin ka hmu." tiin a țawng pawr lo.
Chelsea hian point kua (9)-in hmahruaitu Manchester City an la thlau a, Conte pawhin Pep Guardiola leh a naute hi umphak an harsa tawh dawn tih a hai lo.
Italy leh Juventus manager hlui chuan sawi chhunzawmin, "Manchester City hi an khel țha thei em em a umphak chungchang pawh ngaihtuah ngam a harsa tawh. Game khatah an tumpuite nen an inhnehtawk tihloh chu an la chak vek."
"Hetiang tawhah hi chuan a eng zawnga thil thlir thiam a harsa tawh a, mahse mahni in enin tun inkhel anga kan khelh zel a ngai." tiin a sawi.