​City an chak laiin United erawh an tlawm

22nd October 2017, 04:10AM

Manchester khaw club pahnihte chu an inel chho dawn nia a lan laiin Manchester United chuan Premier League-a an match hnuhnung pahnih atangin point 1 chiah an hlawhchhuah laiin Manchester City erawh an chesual duh lo, point 5-in United an tlansan mek.

Manchester United chuan Huddersfield Town an tlawh a, mual neitu hian 2-1 in hnehna an chang. Jones inhliam chu Lindelof chuan a thlak, hemi hnu lawk hian United chuan an tihsual atangin goal 2 an chhuah.

28 mins-ah Mata tihsual chu Tom Ince chuan tlanpuiin box chhung a thlenpui hnuah a shot, De Gea chuan a lo dang a, hemi per hi Aaron Mooy chuan a pet goal chhunzawm a ni. 33 mins-ah Lindelof chuan ball a tauh per mai dawn emaw tih laiin ho takin a tauh thelh, Laurent Depoitre chuan changin goal-ah a chantir ve leh.

Manchester United chuan an siphurh rulh tumin theih tawp chhuah mahse chance hlauhawm an insiam hleithei lo. Huddersfield goalkeeper Lossl chuan hna a nei zauh zauh, United chuan 78 mins-ah Rashford hmangin goal khat an khung ve hram, Mual dinglam sir atanga Lukaku cross tha zet chu Rashford chuan a tauh goal. Kum 60 hnuah Huddersfield chuan United an hneh leh ta a ni.

Manchester City erawh goal khung an bansan hleithei lo, a zawnin competition hrang hrang game 11-ah hnehna an chang. Burnley an mikhual a, si thum faiin City hian hnehna an chang. Aguero chuan penalty atangin goal hmahruai a khung a,Aguero hian City tan goal 177 a khung ta a, Eric Brook-a record chu a nihrualpui ta a ni. Otamendi chuan Sane corner pet tha zet chu a tauh goal. De Bruyne through ball tha tak chu Sane chuan goal-ah a chantir bawk a ni.

Inkhelh zawhah Manchester City manager Pep Guardiola chuan a zawna game 11 an chak chu lawmawm a tih thu leh chhunzawm zel an tum thu a sawi. Manchester United boss Mourinho erawh chuan chak an phu loh thu leh an results chu an phu tawk lek a nih thu a sawi a. An khingpuite chuan chak duhna thinlung an pu a, an theihna zawng zawnga an khelh avangin an chak a, chak an phu em em a ni tih thu a sawi a ni.

Copyright © inkhel.com 2024. All rights reserved.