Chinese Football Association chuan Chinese Super League club-te chungah dan thar siamin game khatah rampawn player pathum chauh chhawr an phalsak tawh dawn a, he dan thar hi season thar ațangin an hmang țan ang.

He dan thar hian sum tam tak senga Chinese Super League club-te'n player lar an lakluh țhin a tihtawp deuh beisei a ni a, season thar (March thlaa țan tur) ațang chuan team tinin squad-ah Under-23 player pahnih tal kawl tur anih bakah pakhat zawkin inkhel bul a țan ngei ngei tur a ni bawk.

Tuna an dan hman mekah hian team khatin inkhel vawikhatah rampawn player pali an chhawr thei a, rampawn player ni tho Asian player pakhat an chhawr thei bawk a season thar ațang chuan rampawn player (Asian player nilo) hi game khatah pathum chiah an chhawr thei tawh dawn.

Chinese club hausakna hian khawvel player țhate a hip khawm zel a, tunah hian Chelsea striker Diego Costa pawh Chinese club Tianjin Quanjian-in kum khata £30m hlawh turin an sawm tih thawm a awm mek.

Tun thlasik transfer chhung pawhin Chelsea midfielder pahnih - Oscar leh John Mikel Obi-te'n Chinese club hi an zawm tawh a, Manchester United leh Manchester City forward hlui Carlos Tevez pawhin thla hmasa khan Shanghai Shenhua zawmin khawvela footballer hlawh tam ber a ni nghal.

Argentine forward Tevez khelhna Shanghai Shenhua hian Chelsea forward hlui Demba Ba leh Newcastle striker hlui Obafemi Martins an kawl mek bawk a, Costa nena sawi zawm mek Tianjin Quanjian thung hi chuan Belgium midfielder Axel Witsel an nei a Zenit midfielder hlui hi kum khatah £15m chuang an hlawh tir dawn bawk a ni.