Chinese club hausa Tianjin Quanjian coach Fabio Cannavaro chuan Wayne Rooney aiin Fiorentina forward Niko Kalinic lakluh an duh zawk thu a sawi. Rooney-a'n chuai lam a pan mek a, goal khung a harsat sawt hle.

Rooney-a'n United-ah khelhna hmun a chang thei ta meuh lo a, China lam pan mai tur anga sawi nimahse Cannavaro chuan Rooney lak tumna an nei lo tih a sawi.

Italy captain hlui leh Real Madrid tan pawha khel tawh Cannavaro chuan, "Rooney nen inbiakna kan nei ngei a, nimahsela inbiakna satliah mai a ni. Kan khelh duhdan leh Rooney khelh dan hi a inmil lo a, ani ai chuan Kalinic lakluh kan duh zawk," tiin Rooney ai chuan Croatian forward Kalinic an duh zawk tih a sawi.

Chinese club-te sum lamah an buai lo a, Tianjin hian transfer January window inhawn lai khan Aubameyang lakluh an tum tih Cannavaro hian a sawi.

"Aubameyang kha kan dawr ngun hle a, nimahsela Dortmund hotute'n Champions League lama an mamawh avangin chhuahtir an phal lo a ni," tiin tunlai striker țha ber pawl Aubameyang pawh an dawr ngei tih a sawi.