2016 January transfer window a ni a, Europe club lian thawm a dai hle, English club pathum Stoke City, Newcastle United leh Everton-te'n sum an thehchhuak hnem deuhva, Europe league dang erawh an reh thuap mai.
Chutih laiin khawchhak lamah erawh sum a leng nasa hle, Europe-a khel thin player lar China club-ten an rut chho mek. Tunkar thawhtanni khan January transfer window khar a ni a, Chinese club-te chuan player lei nan 200 million euros ($216 million) chuang an hmang hem mai. Nikum January transfer window-a an sum hman let thawk Chinese club-te hian sum an thehchhuak a ni !
Jackson Martinez chu Chinese Super League transfer to ber record niin Guangzhou Evergrande chuan £31m laiin Atletico Madrid atangin an lei. Chelsea midfielder Brazilian Ramires pawh Jiangsu Suning-in 28 million euros laiin an lei bawk a. Tin, Hebei China Fortune chuan 18 million euro-in AS Roma striker Gervinho an lei bakah Shanghai Shenhua pawhin Inter Milan Colombian International Fredy Alejandro chu 13 million euro-in an lei bawk. Atletico Madrid trio Fernando Torres, Gabi leh Tiago-te pawhin China hi an pan dawn an la ti leh zel !
China chuan Europe a run a ni ber mai, enga tinge hetiang em ema Chinese Club ten football-a sum an thehchhuah tam tak ? Football an tui thar em ni ? Enge China-ah thleng ? Heng zawhna zawng zawng hi awlsamtein kan chhang thei ang, an president President Xi Jinping-a vang a ni.
President Xi Jinping-a'n China chu Football Ram ropuia siam a tum
Football hi Europe lamin an khel nasa a, England-te ngat phei chu Football in pui tia inchhal ngat thin kha an ni a. Mahse History thlir let chuan China hi Football khelh hmasakna ram an ni a, Egypt-ah kum 2500 BC khan Football hi khelh a ni tawh nia sawi a ni. 476 BC atanga 221 BC lai vel khan cuju tih hming vuahin Chinese mipuite chuan football tournament an lo khel daih tawh bawk a. Anni ram hnih hi Football khelh hmasakna tia sawi thin an ni.
China president chuan Asia-a ram lian ber China chu an history kaitho leha, Football ram ropui ber nih tumin hma a la chho mek. An ramah Football player tha ber ber chawk luh a, World Cup thlen leh World Cup champion nih chu a thupui ber a ni. Football hi China-ah uar hle mahse Fifa raking-ah chuan 93-na an ni a, khawvel hriatah inphochhuah a, khawvel champion nih an tum ruh hle.
Mi hausa rualin President an thlawp
President Xi-a'n a duhthusam a'n sawi chiah mai chu China rama mi hausa tawntawte an rawn inkau a, Football club thar a piang teuh bawk a, Football lamah sum an vawm ta chur chur a ni ber mai. President Xi-a hian Sports lama China chu khawvel ram ropui berah siam a tum tlat a, kum 10 chhungin Football school 50,000 chuang din a tum a. Tin, Elementary leh middle-school-ah Football chu compulsory subject ni turin a duang bawk a ni.
Mi hausa tam takin club leiin sum an vawm ruih ruih a, an firm thenkhatte hralh hialin Football club an lei ! Mi thenkhat chuan 'Mi hausate chu Football an hmangaih vang ai mahin Preident tlawn an duh vang' niin an ngai, hei pawh hi thil ni thei tak chu a ni ve ngei ang. Mahse ram hotu lu berin Football lama ram hruai a tum miau chuan an ram mipuite chuan an zui lo thei lo a ni.
China hian khawvela player tha ber ber an lalut thei angem ?
Tuna Chinese club-ten an player lakluh ho hi tha tak tak leh hlawh tam tak an ni hlawm a, player upa lam leh hlawh tam tak takte Europe club lian ten hnawh bo nan Chinese club-te hi an hmang mek bawk a. Chutih laiin tun hi bul an tanna chauh a ni a, tun atanga kum 5 chhung chuan China-ah hian player hrawl tak tak an luh a rinawm tlat mai.
Player-te inkhelh chhan chu pawisa a ni a, player hlawh a tam a, China-ah league ropui tak an din dawn a nih chuan player lar tak tak hi an fuankhawm a rinawm. Tin, China hi ram hausa an ni a, hun rei tak chhung an inkhung hrang a, mahse sumdawnna lamah nasa takin an inzar pharh tak chinah chuan mi hausa awm tamna ram a ni chho mek bawk. Ram mipui an tam si, sum a tam bawk si a, tunlai khawvela indona lian ber chu Sports hi a ni a, hetah hian China chuan hnehna chan an tum tlat a ni.