Chhinga Vengin filawr takin league an khel zo va, ningani zan GIG Motors Pro Volleyball League-ah 25-18, 25-19, 25-20 in TNT an hneh a, set hloh lovin vawi li an chak zawn.
GIG Motors Pro Volleyball League chu R. Dengthuama Indoor Stadium-ah khelh chhunzawm a ni a, Chhinga Veng leh TNT Muanna Veng inhmachhawn hi a hmuhnawm kher mai.
A tir atanga a tawp thlengin derthawng lovin Chhinga Vengin inkhel an thunun tluan zak. Mandeep Singh chuan point 18 hmuin vawi thum a tisual a, a vawi thum ban LG D3 Player of the Night atan thlan a ni.
Semifinal lut turin TNT-in chak an mamawh a, mahse, kawng engkimah Chhinga Veng an pha lo. Mi mala che tha ber Laldensanga'n point riat thawk chhuakin point nga a hloh va, tute mah team fuih phur tur khawpa che tha an awm lo.
Chhinga Vengin harsa lo taka set hmasa pahnih an lak zawn hnuin Gurinder Singh an hahchawlhtir a, set hnih a khelh chhungin India captain hlui hian point 11 hmuin point ruk a paih. TNT-in Jatin Singh awltirin Mizo hlangin set thumna an khel bawk.
16-10 in Chhinga Vengin hma an hruai a, Mandeep la chhuakin player langsar lo zawk tan hun tha an siamsak. Set thumna tawp lamah Mizo hlang ve vein team pahnih an inbei a, TNT-in point 20 bak an hlawh chhuak zo chuang lo.
3-0 in Chhinga Veng an chak fai vek a, league-ah chiang takin pakhatna an ni. Point 12 hmuin pahnihna aiin point ngain an sang a, semifinal-ah palina nen an intum dawn a, kar leh thawhlehni zanah an inkhel ang.
TNT-in league vawi li khel kim ve nghalin point thum an nei a, set nga lain set 11 an hloh. Chhinga Veng laka chiang taka an tlawm rualin Ramhlun Sporting Club-in semifinal an lut a, Muanna Veng team dinhmun erawh a derthawng.
RSC-in point thum tho hmu mah se set li lain set ruk an hloh a, zirtawpni zana an khelh tur 3rd MAP lakah set khat mah la lovin tlawm pawh ni se point inangah TNT aiin an sang dawn.
League inkhel hnuhnung berah Police an tlawm a nih chuan TNT an tlang thei ve thung. Chuti ni lova MAP-in RSC an hneh a nih chuan team panga inel zingah semifinal lut pha lovin TNT chiah an tla dawn a ni.
FIXTURE
Jun 9, 2017 (zirtawpni), 8:00pm
Ramhlun Sporting Club v 3rd MAP