Chhangphut field-ah Ramhlun North FC chungnung zawk mahse AR Lammualah erawh Chhinga Veng FC leh Ramhlun North FC te hi 1-1 in an inhnehtawk a, November ni 3, 2016-a Mizoram Premier League match-ah Chhinga Veng FC defender Emma chu man of the match-a thlan a ni.
Dinthar FC-in Zo United FC an hneh avangin point 11 an nei a, Ramhlun North FC pawhin point 11 tho an nei a, Chhinga Veng FC erawhin point 9 chiah an la hlawhchhuah avangin table-ah 7-na an ni mek. Season chawhnu lam a ni tawh bawk si nen, MPL-a cham zel tur chuan an beih nasat a ngai dawn a ni.
Chhinga Veng FC 1-1 Ramhlun North FC
(MS Dawngliana 34') (Zosangliana Sailo 87')
Chhinga Veng FC XI : R. Lalhmangaihzuala, K. Lalthlahlova, Lalramfelpuia, Ugochukwu Chigozie Emmanuel, R. Laldinliana, Joy Mrona Khar Raswai, Vanlallawma, H. Lalmuankima, Vanlalthanga, MS Dawngliana, Joseph Lalnunpuia.
Ramhlun North FC XI : Liansangpuia, Lalramthlamuana, Lalmalsawma, Lalmuanawma, Zosangliana Sailo, C. Ramdinmawia, David Lalrinchhana, Lalruatkima Dosel, Isaac Lalruatpuia, B. Malsawmzuala, Onyeama Francis Okechukinu.
Chhangphut field-a a chet dan avangin Chhinga Veng FC coach Chawnga hrem a la ni a. Technical area-ah awm thei lo mahse mipui thutna atangin a team nasa takin a fuih tho a. Chhinga Veng FC hian Khawpuimawia chu inhliam avangin an chhawr thei lova, Dawngtea chuan inkhelh bul tanin goal pawh a khung nghe nghe.
First half 34 mins-ah Dawntea chuan Chhinga Veng FC tan goal a khung a. Joseph-a ball tha zet chu Dawngtea chuan box chhung atangin goal-ah a lo chantir a ni. First half-ah MK-a chuan chance tha zet nei mahse goal a khung thei lo. Midfield-ah Ramhlun North FC chungnung deuh mahse chance erawh an insiam hleithei lo.
Second half-ah Ramhlun North FC chuan an si phurh sut tumin counter attack-in an nawr thut thut a, David-a leh Thlamuana te'n an si phurh sutna hun tha nei mahse goal an thun thei lo. Chhinga Veng FC chuan hnehna an chang mai dawn emaw tih hnuah Ramhlun North FC chuan minute 87-ah penalty an hlawh chhuak a.
He penalty hi Chhaia chuan pet goal-in Ramhlun North FC si phurh a rul. Chhinga Veng FC hian hun tawp dawn tak takah chakna goal an khung teuh hle a, Joseph-a goal khung tur chu Ramhlun North FC goalkeeper Sangpuia chuan a lo dang hlauh a, MPL5 Round 10-ah 1-1 in an inhnehtawk ta a ni.