MC Dowell's No 1 Soda Mizoram Premier League Season 5 Round 7-na chu Chhangphut Field, Champhaiah khelh a ni a, Round 7 ni hnihnaah Ramhlun North FC chuan 3-2 in Chhinga Veng FC an hneh a ni.
Chhinga Veng FC hian an Nigerian player thar Emmanuel Chigozie chu chhawr mahse Chigozie hi debut match-ah a che chhe hle a, an lamah goal a khung nghe nghe a ni. He match-ah hian Ramhlun North FC midfield phui taka uap lumtu Lalchhuanpuia chu man of the match-a thlan a ni.
Ramhlun North FC 3-2 Chhinga Veng FC
(MC Malsawmzuala 63'pen, Emmanuel Chigozie 83'OG, C Ramdinmawia 90+4') (Zonunsanga 53', H Lalmuankima 68')
Ramhlun North FC XI: Sangpuia, Malsawma, Muantea, Ramdina, Muanawma, Anggu, Chhuanpuia, Thlamuana, Chhaia, David Tlau, Mca.
Chhinga Veng FC XI: Isaac, K Patea, Emma, Felpuia, Paul, Joseph, VL Thanga, Mka, Chhantea, Mapuia, Zonuna.
October ni 7, 2016-a MPL Round 7 match hmuhnawm takah hian first half-ah goal a lut lova, team hnihte hian chance tha tak an nei ve ve a, MK-a leh Khawpuimawia te shot tha zet chu Ramhlun North FC goalkeeper Sangpuia chuan a lo dan sak ve ve a. Ramhlun North FC pawhin Thlamuana leh MCa hmangin chance nei mahse Chhinga Veng FC goalkeeper Isaac-a chuan a lo dang hman bawk a ni.
Second half-ah goal 5 lai a lut a, Chhinga Veng FC chuan second half tan atanga minute 7 lekah Zomuana, Mka leh Khawpuimawia te thawhrah sengin Zonunsanga chuan hmahruaina goal a khung. Chhinga Veng FC hian hma an hruai rei lo. Minute 10 pawh a ral hmain Ramhlun North FC chuan penalty an hlawhchhuak a, he penalty hi MC Malsawmzuala chuan pet goal-in Ramhlun North FC si phurh a rul.
68 mins-ah H Lalmuankima chuan free kick atangin mawi takin goal a khung a, Chhinga Veng FC chu 2-1 in hma a hruaipui leh. Chhinga Veng FC chuan point 3 an hlawhchhuak mai dawn tawh nia an inngaih laiin hun tawp nan minute 7 a la awm tihin Ramhlun North FC chuan an si phurh an rul a. Chhuanvawra ball vawrh tha zet chu Chhinga Veng FC defender thar Emmanuel Chigozie chuan an lamah a ti goal palh hlauh mai. 2-2 a ni a, point khat ve ve an hlawhchhuak dawn nia a lan laiin added time-ah goal khat a lut leh ta.
Hun pangngai a zova, added time minute 4 a ni, he hun pekbelh hi Ramhlun North FC chuan chance-ah an hmang. Midfielder Chhuanpuia ball vawrh tha tak chu box chhunga lo awm C Ramdinmawia chuan goal-ah a chantir a, chakna goal khungin 3-2 in Ramhlun North FC chuan hnehna an chang ta a ni. Team hnihte hian khelh 7 atangin point 7 ve ve an nei ta a ni.