September ni 21, Zirtawpni tlai Mc Dowell's No 1 Soda Mizoram Premier League Season 7 Round 3 Champion lai Chhinga Veng FC leh Ramhlun North FC te inkhelah Chhinga Veng FC chuan 2-1in Ramhlun North FC an hneh a, point 3 an hlawh chhuak. He inkhelah hian Chhinga Veng FC goalkeeper Zothanmawia (T. Mawia) chu Man of the match-ah thlan a ni.
Goal lut te hi first half leh second half-a lut an ni a, Chhinga Veng FC tan Lalromawia leh F. Zosangliana chuan goal khat ve ve an khung a, Ramhlun North FC tan Laldingngheta chuan goal khat a khung ve bawk.
Chhinga Veng FC hian hneh loh anla neilo a, Chawnpui FC an hneh hnuah Bethlehem Vengthlang FC an hneh leh a, Ramhlun North FC hneh leh in khelh tawhah point 9 an nei tawh a ni. Ramhlun North FC hian Chanmari FC an hneh loh hnuah Chawnpui FC an draw-a, Chhinga Veng FC an hneh lo leh a, khelh tawhah point 1 an nei ve bawk.
04:00 PM Chhinga Veng FC 2-1 Ramhlun North FC
(Lalromawia 71' (penalty) F. Zosangliana 90+3') (Laldingngheta 22')
MoM: Zothanmawia, Chhinga Veng FC
Inkhel tan a ni a, team pahnih te an innawr tawn zak zak a, Ramhlun North FC chuan goal thunna hun tha nei hmasa zawk mahse Lalliansanga (Notea), R. Lalthanmawia leh Jessy Vanlalmuana ten an hun tha an hmang tangkai thei lo. Chhinga Veng FC pawhin goal thuna hun tha nei ve bawkin F. Lalnuntluanga, Rammawia leh Romawia ten an hun tha neih an hmang tangkai thei bik lo.
Ramhlun North FC chuan an hun tha neih hmang tangkai hmasa zawkin minute 22-ah Lalliansanga (Notea) ball vawrh luh tha zet chu Dingngheta chuan box-ah la lutin an hmahruaina goal a khung a, goal dang luh belh lo in first half-ah Ramhlun North FC chuan 1-0 a hmahruaiin chawlhlawk an hmang.
Second half-ah Chhinga Veng FC chuan nawr nghalin Lalnuntluanga (Tluangtea) ball pek tha zet chu Rammawia chuan goal zawnah a tauh lo a, minute 71-ah Chhinga Veng FC chuan penalty an hlawh chhuak hlauh a, he penalty hi Lalromawia chuan an siphurh rulh nan a hmang zui ta a ni. Ramhlun North FC chuan hnehna chan ngei tumin an nawr a, minute 73-ah penalty an hlawh chhuak ve thung a, he penalty hi Lalliansanga (Notea) chuan petin keeper T. Mawia chuan a dan sak thung.
Chhinga Veng FC pawhin goal thun belhna hun tha nei leh in Lalnuntluanga (Tluangtea) chuan a hun tha a hmang tangkai thei lo. Chak zawk awmlo in khelmual an chhuah san mai dawn emaw tih hnu injury time-ah Chhinga Veng FC chuan an hun tha neih hmang tangkaiin Lalnuntluanga (Tluangtea) goal shot tha zet chu Ramhlun North midfielder Lalliansanga (Notea) chuan dangperin he ball per hi box chhunga awm Zosangliana chuan goal-ah a chantir a, an chakna goal a ni zui ta a ni.
(adsbygoogle = window.adsbygoogle || []).push({});