​Chhinga Veng FC-in Assam Rifles Team an sawp

05th November 2017, 02:11AM

November ni 4, Inrinni tlai Assam Rifles football team leh Mizoram Premier League 6 hmahruaitu Chhinga Veng FC te inkhelah Chhinga Veng FC chuan 8-0 in Assam Rifles Football Team an sawp.

(adsbygoogle = window.adsbygoogle || []).push({});

Chhinga Veng FC tan Lalrammuanpuia (Apuia) chuan goal hnih a khung a, Lalkhawpuimawia, Laldingngheta, Laldampuia 52, Joy, Malsawmfela leh Hmingthanmawia ten goal khat theuh an khung bawk.

Nikum October thla khan Assam Rifles hian MPL 5 hmahruaitu Bethlehem Vengthlang FC hi 3-2 in hneh mahse, kumin MPL 6 hmahruaitu Chhinga Veng FC lakah an mualpho thung.

Coach Lalsangzuala Hmar hnuaiah Chhinga Veng FC hian MPL 6-ah match 12 khelhah point 27 an hmu a, goal 26 khung tawhin goal 14 an chhuah thung a, Aizawl FC chiah hneh loh an nei a, League hmahruaitu an ni mek a ni.

Assam Rifles 0-8 Chhinga Veng FC

(Lalkhawpuimawia 8', Laldingngheta 44', Laldampuia 52', Joy 58', Lalrammuanpuia 69', 87', Malsawmfela 71', Hmingthanmawia 78',)

Assam Rifles XI:Bechung Bhutia, Sunder Singh, Gopin Singh, S Basumatary, I.B Boruah, Lalrinmawia, Jacob, S Chuba, Robert, Vanlalliana, K. G Anal.

Chhinga Veng FC XI: Lalmuansanga, Zothanmawia, Ramfangzauva, Lalramliana, Lassi, Joy, Olawale, Lalchhuanpuia, Laldingngheta, Laldampuia, Lalkhawpuimawia.

First half-ah goal hnih a lut a, goal lut hmasa ber hi minute 8-ah mual veilam sir a tang a Dingngheta ball pek chu Khawpuimawia chuan chiang zetin a pet goal. Chhinga Veng FC chuan nawr chhunzawmin Dampuia leh Dingngheta chuan goal thun belhna hun tha an hmang tangkai lo. Assam Rifles chuan goal thunna hun tha nei ve bawkin S. Basumatary chuan freekick atangin goal kham a pet per hlauh.

Chhinga Veng FC chuan huntawp dawn minute 44-ah Khawpuimawia thawrah sengin Dingngheta chuan an goal hnihna khungin 2-0 in chawlhlawk an hmang.

Second half-ah Chhinga Veng FC bawk chungnung zawkin minute 52-ah Dampuia chuan an goal thumna a khung a, minute 6 aral leh hmain Zautea ball pek tha zet chu box chhung a awm Joy-a chuan an goal li na a tan a khung zui nghal zat bawk.

Chhinga Veng FC tan minute 69-ah Lalrammuanpuia (Apuia) chuan an goal nga na a khung leh a, minute 2 aral leh hmain Sawmfela chuan an goal ruk na a khung zui leh nghal zat.  Minute 78-ah Hmingthanmawia chuan an goal sarihna khung leh in minute 87-ah Lalrammuanpuia (Apuia) bawk chuan an goal riatna a khung leh ta a ni.

Huntawp dawnah Assam Rifles chuan goal thunna hun tha nei ve bawk mahse, Robert-a leh bench a tang a lut D. Basumatary goal shot chu Chhinga Veng FC keeper Muansanga chuan a dan sak ve ve a, Chhinga Veng FC chuan 8-0 in hnehna an chang ta a ni.

(adsbygoogle = window.adsbygoogle || []).push({});

Copyright © inkhel.com 2024. All rights reserved.