MC Dowell's No 1 Soda Mizoram Premier League Season 5 Round 14-naah semi final khel tur hriat kim a ni ta. November ni 24, Ningani zan semi final luh inchuh match-ah Chanmari West FC chuan si hnih faiin Chhinga Veng FC an hneh a, Chanmari FC, Bethlehem Vengthlang FC, Aizawl FC leh Chanmari West FC te chuan MPL 5 semi final an khel dawn ta a ni.

Chanmari West FC leh Chhinga Veng FC te chak zawk zawk hian semi final an khel dawn a, Chhinga Veng FC chuan Dampuia an ngam ta lo. Laldampuia chuan Chhinga Veng FC lamah goal hnih a khung a, si hnih faiin Chanmari West FC chuan hnehna an chang. He match-ah hian Dampuia hi man of the match a ni chiang hle. Tun season MPL-ah Dampuia hian goal 10 a khung tling ta a ni.

Chanmari West FC 2-0 Chhinga Veng FC

(Laldampuia 11', 57')

Semi final luh inchuhna match-ah hian Chanmari West FC chuan draw chiah an mamawh tawh, hetih lai hian Chhinga Veng FC tan erawh chak ngei ngei an mamawh. Inkhelh tan atangin Chhinga Veng FC chuan an nawr nghal a, chance pawh an hmu nghal. MK-a chuan chance tha tak a hmang tangkai lo. Minute 11 a ni a, Danmawia, Ramenga leh Hlutea te thawhrah sengin captain Dampuia chuan Chanmari West FC goal hmahruai a khung.

Chhinga Veng FC hian an si phurh rulh tumin an nawr a, MK-a bawk chuan Chhinga Veng FC tan chance hlauhawm a nei, a shot tha zet chu Chanmari West FC goalkeeper Ruatpuia chuan a lo dang hlauh. Chhinga Veng FC coach Chawnga chuan game thlak tumin first half-ah substitution a siam, Francis-a dahlut mahse awmzia a nei chuang lo.

Second half 57 mins-ah Danmawia ball lakluh tha zet chu Chhinga Veng FC defender Thlahlova chuan box chhungah a lo titlu, referee chuan foul a ham a, penalty a pe ngei dawn nia a lan laiin box pawn chiah chiahah ball a dah, Chanmari West FC chuan free kick an hlawhchhuak ta zawk a.

He free kick hi Dampuia chuan petin, lei hrul kil sir takah a pet goal ta tho tho a, si hnih faiin Chanmari West FC chuan hma an hruai. Chanmari West FC chuan substitution an siam a, Ramenga chuan hun khawhral pahin muangchangin mualchhung a chhuahsan, referee chuan Ramenga hi yellow card pein, yellow card a hmain a lo chawi tawh bawk si a, red card phawrhin a hnawtchhuak zui nghal a.

Kim lo chungin Chanmari West FC khel mahse an goal an humhim, si hnih faiin an chak ta a ni. He match half time-ah tunlai Zoram Music khawvela mite lawm hlawh ber Ruatfeli leh Lilzo an zai tir, mipui lamin an lawm hle a, inkhelh zawhah pawh anni pahnih hi an zai leh a, lilzo chuan lawm a hlawh fal, lammuala inkhel entu zawng zawng chu Pavilion hmaah pungkhawmin an lam suau suau a, kham lo takin hun an ti tawp ta a ni.