Chhinga Veng FC chuan an that zia an lantir chho zel a, tun season Mizoram Premier League-ah an la tlawm lo, vawi nga khel tawhin vawi li an chak a, vawi khat an khingpui an inhnehtawkpui, MPL6 hmahruaitu an ni chhunzawm zel.

September ni 22, 2017 zan khan Chhinga Veng FC hian si khat faiin champion lai Chanmari FC an hneh a, chakna leh goal awmchhun khungtu hi Lalkhawpuimawia a ni a, he match-ah hian Chhinga Veng FC midfield innghahna Lalrinchhana chu man of the match-a thlan a ni.

Chhinga Veng FC 1-0 Chanmari FC

(Lalkhawpuimawia 60')

Chhinga Veng FC XI: Laldampuia, Vanlalawma, Zothamawia, Lalrinchhana, Malsawmfela, MS Dawngliana, R Lalawmpuia, R Laldinliana, Lalrinchhana Tochhawng, Hmingthanmawia, R. Malsawmtluanga.

Chanmari FC XI: C Lalrosanga, Rochhingpuia, Joseph Lalnunpuia, Jacob Vanlalhlimpuia, Vanlalbiaa Chhangte, Thomas Lalengkima, F Lalmuanawma, Thasiama, Joe Zoherliana, Joseph Lalfakzuala, Alex Whittemore.

Chhinga Veng FC hian coach Sanga hnuaiah Mizoram Police FC leh Chanmari West FC an hneh hnuin Aizawl FC an draw-a, Bethlehem Vengthlang FC an hneh leh hnuah Zirtawpni zan khan Chanmari FC an hneh leh a, hneh loh la tawng lo Chhinga Veng FC hian match 5 khel tawhin point 13 an nei a, hmahruaitu an ni mek.

Chanmari FC hian coach Thlanga hnuaiah Dinthar FC an hneh hnuah Aizawl FC an draw-a, Mizoram Police FC leh Ramhlun North FC hneh lehin; Chhinga Veng FC lakah erawh an tlawm ta a, khelh 5 atangin point 10 an nei a, table-ah pahnihna niin hmahruaitu Chhinga Veng FC point 3-in an phak lo mek.

League hmahruaitu nih inchuh an ni a, AR Lammualah entu mipui an pungkhawm hnem hle. Team tha pahnih an ni a, a tir atangin an innawr tawn zak zak. Chance hlauhawm pawh a awm nghal nual. Jakob-a chuan Chanmari FC tan goal khungna hun tha tak nei mahse goal zawnah a tauh lo hlauh. Dampuia leh Sawmfela te an hlauhawm thin hle a, hetih lai hian first half-ah goal an thawkchhuak thei bik lo.

Chanmari FC tan Mabiaa chuan clear chance a nei, Chhinga Veng keeper T.Mawia chiah a hmachhawn tawh hnuah a pet goal lo. Tin, Dampuia shot tha zet chu Chanmari FC goalkeeper Muanawma chuan tha takin a lo dang.

Second half-ah Chhinga Veng tan Khawpuimawia rawn lutin danglamna a rawn thlen nghal a, minute 60-ah Sawmfela ball vawrh tha zet chu Khawpuimawia chuan goal-ah a chan tir a, he goal hi Chhinga Veng chakna goal a ni ta a ni.

Chhinga Veng chuan goal thun belhna hun tha an nei chhunzawm nghal zat a, Sawmfela chuan goal kham a pet per dawp. Chanmari FC tan Muanzova rawn lut ve bawkin an goal bawh na sawt mahse danglamna erawh a thlen thei lo.

Hun tawp dawnah Chanmari FC tan Striker Alex Whittemore chuan an siphurh sutna hun tha a hlah hnuah Mabiaa chuan goal thuna huntha a hlah chhunzawm ve bawk. Goal dang luh belh loin Chhinga Veng FC chuan 1-0 in hnehna an chang ta a ni.

Chhinga Veng FC hian September ni 29, Zirtawpni tlai dar 3:00-ah Ramhlun North FC an hmachhawn ang a, Chanmari FC hian chumi zan dar 7:30-ah Bethlehem Vengthlang FC an hmachhawn thung ang.

Reporter : PC Lala