Mizoram Premier League Season 6 league round hnuhnung ber match hmasa berah semi-final lut ve ve tawh Chhinga Veng FC leh Mizoram Police FC ten an khel a, Chhinga Veng FC chuan 2-1 in Mizoram Police FC an hneh a, he inkhelah Chhinga Veng FC winger Laldingngheta chu Man of the Match-ah thlan a ni.
Chhinga Veng FC tan Khawpuimawia leh MS Dawngliana chuan goal khat ve ve an khung a, Mizoram Police FC tan F Lalrinpuia (Valpuia) chuan goal khat a khung ve bawk.
Phase 1 Round 1-ah Chhinga Veng FC hian 4-1 in Mizoram Police FC an hneh tawh a, an intawn vawi hnihna Chhinga Veng FC an chungnung leh bawk.
Chhinga Veng FC 2-1 Mizoram Police FC
(Lalkhawpuimawia 23', MS Dawngliana 72') (F Lalrinpuia 75')
Semi-final lut chiang tawh Chhinga Veng FC hian coach Lalsangzuala Hmar hnuaiah Aizawl FC chiah hnehloh an nei a, point 33 neiin hmahruaitu an ni mek a, zan inkhelah Chanmari FC-in Dinthar FC an hneh chuan Chhinga Veng FC hian Police an hmachhawn leh ang.
Mizoram Police FC hian coach thar Lalbiaksanga Colney hnuaiah match kua atangin point 19 an hmu a, table mawngphah atangin pathumnaah an inhlangkai a, khelh tawhah point 20 neiin table-ah pathumna an hauh rih a, zan inkhel Chanmari FC leh Dinthar FC result a zirin semifinal-a an hmachhawn tur a hriat ang.
Goal lut hmasa ber hi first hlaf-a lut a ni a, minute 23-ah Chhinga Veng FC tan mual veilam sir ațang a Dingngheta ball pek chu Khawpuimawia tauh lutin goal hmahruai a thun a, second hlaf-ah Chhinga Veng FC tan minute 72-ah Dingngheta thawhrah sengin Dawngtea chuan an goal hnihna a khung ve thung.
Minute 75-ah Mizoram Police FC tan F Lalrinpuia (Valpuia) chuan freekick atangin an goal khatna thun mahse goal dang an thun belh thei tawh lo a, Chhinga Veng FC chuan 2-1 in hnehna an chang ta a ni
Inkhel țan ațangin Chhinga Veng FC hian inkhel thunun zawkin chance pawh an nghah zawk a, Khawpuimawia, Vanlallawma leh Dingngheta-te chuan goal thun belhna hun țha nei mahse, an hmang țangkai lo.
Second hlaf-ah Mizoram Police FC pawhin goal thunna hun țha an nei nual a, F Lalrinpuia (Valpuia) chuan vawi hnih lai goal thunna hun tha a hlah a, Biakhlua chuan goal kham a pet per dawp bawk.
Chhinga Veng FC pawhin goal thun belhna hun tha neiin Dawngtea leh Khawpuimawia chuan an hun țha neih an hmang țangkai thei lo.
Semi-final first Leg hi November ni 23, Ninganiah khelh tur a ni a, table pahnihna leh pathumna ten an khel ang a, November ni 24, Zirtawpniah table-a pakhatna leh palina ten an khel ve bawk ang.