Mahuma Memorial Cricket Tournament Round 2 chu November ni 22, 2016 khan khelh zawh a ni a, match hnuhnung berah Chhinga Veng Cricket Club leh 1st division kai thar Luangmual Cricket Club an inhmachhawn a, Chhinga Veng hian run 148 zetin Luangmual hi an sawp a ni.

Toss-a chak zawk Luangmual lamin vawm hmasak an thlang a, an tum ang erawh a ni hauh lo mai. 3C batsmen ten Luangmual bowler te an ngam hle a, an duhna apiangah an vuak sak a ni ber mai.

Oener Abhay Joshi chuan ball 62 a hmachhawn atangin run 62 zet a vaw chhuak a, Gaurav Singh (34 runs) leh Christopher Lalhruaitluang (39 runs) ten an chhunzawm tha bawk. Tun tournament-a innings khata run siam hnem ber ni turin over 39-ah out vek mahse run 226 zet an siam a, target um huphurhawm tak 227 siam ta a ni. Luangmual bowler-ah Zaithanmawia chuan over 6 vawmin wicket 3 a la a, run 35 a pe a ni.

Luangmual lamin an target a sang tih hriain muangchang leh fimkhur taka um chi a ni lo tih an hria, a tir atangin vuak nghal an tum deuh vek a, an chetsual phah ta. G. Lalbiakvela'n ball 45 a hmachhawnah run 25 a vaw chhuak tih loh chu tumah Luangmual batsmen double figure kai ve an awm lo.

Over 24 ah run 78 siamin an out ta vek a, 3C te hian kai thar Luangmual CC te run 148 zetin an sawp ta a ni. 3C bowler-ah Lalruatdika chuan over 7 a vawmah run 16 pein wicket 3 a la a, run 62 zet vaw chhuaktu Abhay Johsi pawhin wicket 2 a la ve bawk a ni.

23.11.2014 (9:15 AM)

ROUND 3

Chanmarians CC vs Tlangnuam CC