Manchester Arena-a chhiatna tawkte tan Manchester City midfielder Yaya Toure leh a agent chuan £100,000 an pe dawn.

Thawhțanni khan Manchester Arena-a zaithiam lar Ariana Grande-i'n concert a neih zawh hnuin bomb a puak a, hei vang hian mi 22-in nunna an chan bakah mi 59-in hliam an tuar bawk.

Bomb tipuaktu hi Salman Abedi a ni tih hriat a ni tawh a, Islamic State of Iraq and Syria (ISIS) mi leh sa a ni bawk.

Toure agent Dimitri Seluk chuan nunna chan leh hliam tuarte tan hian sum thawh an tum tih hi BBC Sport hnenah a sawi a, bomb puak vanga thi zingah hian hmeichhe naupang kum riat mi Saffie Rose Roussos pawh a tel nghe nghe.

Seluk chuan, "Thawhlehni khan Yaya ka bia a, chhiatna thleng hian a țhawng ve hle a tih theih kan neih min zawt. Manchester Evening News nen inremna siamin kan sum thawh tur hi a mamawhte hnen a thlen theihna tura min pui turin kan ngen."

"Bomb puak vanga chhiatna tawkte tan hian £50,000 ve ve thawh kan remti a, Yaya hi Ivory Coast lam mi anhi laiin kei hi Russian ka ni thung a hei hian awmzia erawh hemi chungchangah hian a nei lo."

"Sum hi hmundanga hman atan kan ti lo va tupawhin kan hmanna tur chu an hria. A mamawhte hnenah chauh a thleng a ni tih hi chian kan duh. Sum in hlan chungchang hian ni rei vak lo chu a awhin a rinawm a, Yaya pawh England-ah a awm mek a lokalin a tihfel thuai theih."

"Amah hian Manchester khawpui hi a ngaina mi chengte nen pawh inlaichinna țha tak an nei." tiin a sawi.

Kum 34 mi Toure hian kum 2010 khan Barcelona chhuahsanin City hi a zawm a, Premier League leh League Cup-ah vawihnih ve ve a champion pui tawh a FA Cup pawh vawikhat a chawipui tawh bawk a ni.

* Photo: Getty