Zanin dar 8:30 PM hian Stamford Bridge-ah Chelsea chuan Manchester United an mikhual dawn. India TV atang chuan Starsports 4 leh Starsports Select HD1-ah kan en thei ang.

He fixture hian ngaihven a hlawh a, a chhan pawh Jose Mourinho-a'n, "Ka hmangaih club," tia a sawi thin Chelsea a hmachhawn dawn vang a ni. Nikum December thla khan Chelsea chuan Jose Mourinho an ban a, an hmelma Manchester United chuan an ruai ve chat, Mourinho chuan Chelsea a hmachhawn dawn ta a ni.

Coach ten enge an sawi?

"Chelsea team-in bul an tan dan hi sawi vak tur awmin ka hre lo, table-a an awmna kan hria a, team chhe tak an ni lo chiang mai.

"England-a hnathawh a; Premier League team enkawl chuan eng tikah emaw Chelsea ka la hmachhawn ngei dawn tih ka hria. Stamford Bridge-ah ka lut leh ngei dawn tih ka hre chiang. Fixture chuan kal turin min ti ta a, kan kal dawn ta a ni," tiin Mourinho chuan Chelsea a tlawh tur chungchang a sawi.

Chelsea coach Antonio Conte chuan, "Liverpool leh Arsenal kan hmachhawn dan ngaihtuahin tun Pathianni hian hmasawnna nasa tak ka team-ah hmuh ngei ka duh a ni. Ka inringtawk em em bawk a ni.

"Tactical game a ni leh ngei dawn a, hetih lai hian fan ten tha nasa takin an thawh chuan chu chu kan chan thatna tur chu a ni.

"Mourinho hi ka zah em em a, tha taka lo mikhual pawh a phu. Chelsea tana mi pawimawh tak niin Chelsea History ropui tak ziaktu pakhat a ni bawk," tiin a sawi.

Chelsea fan ten Mourinho an la hmangaih

Hei hi thu dik a ni. Thla 10 liamta mai kha a la ni a, Chelsea player thenkhatin Mourinho an phatsan nia ngaih a ni. Hei vang hian Chelsea supporter te chuan Mourinho phatsantu player-te chu an boo khum hial a nih kha.

Mourinho-a'n Manchester United a enkawl tirh khan Premier League fixtures zinga ngaihven hlawh ber chu zanin match hi a ni tlat mai. Chelsea supporter-te hian Manchester United boss hi an auh nawmnah a rinawm loh.

Jose Mourinho-a'n Real Madrid a enkawl tawp lamah khan England lama kal a tum thu a sawi, "Ka hmangaihte awmnaah ka kal dawn. Anni pawhin min hmangaih a ni," tiin a sawi a nih kha. Ka hmangaih a tihte chu Chelsea club leh supporter-te kha an ni si a.

TEAM NEWS

Kheimit hliam avanga chawl Captain Terry chu a dam chiang tawh a, zanin hian Conte chuan a chhawr dawn nge dawn lo tih erawh a hriat loh. Willian leh Oscar te chuan chawlh an hmang zo tawh a, Chelsea tan mamawh hun lai takin an kir leh ta a ni. Hetih lai hian Fabregas leh Ivanovic te erawh tha hliam vangin zanin hian an inlan ve thei dawn lo a ni.

Fenerbahce nena an intum tuma tha hliam nei Chris Smalling chu zanin hian a inlan thei dawn nge dawn lo a hriat lohva. Ani bak player pawimawh inhliam United hian an nei lo, Henrikh Mkhitaryan pawh malpui hliam avangin chawl ren rawn mahse zanin hian hman theihin a awm dawn a ni.

Manchester United-in eng game nge an khelh ang?

Kar hmasa kar laihawlah khan Fenerbahce chu 4-1 laiin United hian an hneh. Kha match-ah khan attacking game khel turin Mourinho chuan midfield tha takin a rem a, a tum ang ngeiin a midfielder ten an khel chhuak. Carrick leh Pogba a inkawp tir a, an hma chiahah Mata a awm bawk a, a fuh hle tih a lanna chu Pogba khan goal hnih a khung a, tha takin a khel a nih kha.

Hetih lai hian Jose Mourinho hian fimkhur taka Liverpool a hmachhawn ang khan zanin hian Chelsea a hmachhawn kei chuan ka ring. Liverpool nen goal awm lova an inhnehtawk tum khan Jose khan point khat tal Anfield-a hlawhchhuah a tum a, a game plan a fuh hle, a tum ang takin United khan an khel a, Fellaini, Pogba leh Herrera te an khel tha hle a, United tum ber kha chu goal chhuah loh a nih avangin Fellaini leh Herrera te an khel tha fal hle a nih kha.

Jose Mourinho hian Premier League a hrechiang a, champion dan pawh a hre chiang. Chelsea a enkawl lai khan a game khelhpui dan kan hrechiang a, zanin hian United hian Chelsea hi an nawr pup pup a rinawm loh, Conte pawhin tactical game an khelh a ring a nih kha, Jose hian midfield bit takin a rem ngei ka ring a, dinglam emaw veilamah emaw player tlanchak a dah ka ring bawk.

Tin, hmatawngah goal khung thei Zlatan a dah ngei a rinawm bawk a. Inkhel hmunawm tak hmuh ka beisei lo, draw game a nih leh kei chuan ka ring a ni. Chelsea tlar hma lam pawhin thil ropui tak an tih theih a rinawm chuang lovah, hetih lai hian a tu emaw zawk zawk hian vanneih goal an khung hlauh thei bawk a ni.

Chelsea-in eng game nge an khelh ang?

Arsenal leh Liverpool laka a chesual hnuah, Conte chuan fimkhur takin a khel chho leh a, hnehna a chan chhoh pui leh. Leicester City an hmachhawn tum kha chuan 3-4-3 formation a rawn hmang leh a, attacking football mawi tak an khel, tun season-a Chelsea game that ber tum a ni kei chuan ka ti.

Hetih lai hian Conte chuan Manchester United hmachhawn turin defender 3 lek a dah a rinawm chiah loh. Defender 4 a dah a rinawm a, Matic leh Kante an inkawp leh ngei a rinawm. Midfield battle kan hmuh ka ring a, Jose-a'n United defensive third-ah khawng taka player a rem chunga; Chelsea hian nawr an tum a nih chuan wing play emaw an hman a rinawm a ni.

Mourinho-a'n Chelsea player-te a hriatchian ang bawkin Conte chuan Juventus-a a player tangkai thin Pogba a hrechiang a. Khawvela footballer man to ber Pogba hian Italy-a a form la phak lo mahse game-ah danglamna siam thut thei a nih reng avangin Conte chuan Pogba dahthat dan a ngaihtuah ngei a rinawm a ni.

Mourinho vs Conte

Coach tha ve ve an ni a, hetih lai hian team thar ve ve an enkawl avangin fimkhur taka hun an hman a ngai. Conte pawhin pressure sang tak a hmachhawn tawh a, Liverpool leh Arsenal laka an chak loh avang khan club neitute nen meeting nuam tak ni hran lo an nei a nih kha.

Chelsea game atana tha ber tur a ngaihtuah a, enchhinna te a nei chho a, season hmasaa Klopp-a'n Liverpool a enkawl ang kha a ni chho ve mek, Man Utd laka an tlawm a nih chuan a mualpho thlak dawn em avangin game him khelh a tum a rinawm.

Mourinho a fing hle a, khawvela fans nei hnem Man Utd coach nih chu pressure a san zia a hrechiang, sum tam tak a hmang bawk nen, an chak lo a nih chuan amah duh lohna tawngkam a tawng leh nual dawn a, chuvang chuan ani pawhin game him khelh a tum ngei ang le.

Head-to-head

League leh cup-a an inhmachhawn hnuhnung vawi 10-ah Chelsea an chungnung lawr lak a, Chelsea hian W5, D5 records an nei a ni. Tin, League-ah United hi kum 2002 hnuah khan Stamford Bridge-ah kum 2012 khan an chak leh hram a, zanin hian Chelsea an chak a nih chuan competition hrang hranga Chelsea-in United an hneh vawi 50-na a ni dawn a ni. Stamford Bridge-a League game-a an inhmachhawn vawi 6-ah red card vawi 4 phawrh a ni nghe nghe.