13 Sep 2017 03:22

Inkhel

Mizo Sports Website hmasa ber

​Chelsea-in Qarabag an sawp

English Champions Chelsea chuan awlsam takin Champions League vawi khat khelhna Qarabag an hneh a, London club hian si 6 faiin Azerbaijan club hi an hneh a ni.

Tun Pathianni lo awm turah hian Chelsea chuan Premier League-ah Arsenal an hmachhawn dawn, Conte chuan hemi hre reng chung hian team a rem a, chuti chung chuan goal 6 lai an khung.

Chelsea tan hian Batshuayi chuan goal hnih a khung a, Monaco atanga an lei thar Bakayoko chuan goal khat khungin, Pedro, Zappacosta leh Azpilicueta te chuan goal khat theuh an khung bawk.

Chelsea 6-0 FK Qarabag

(Pedro 5', Zappacosta 30', Azpilicueta 55', Bakayoko 71', Batshuayi 76', 82')

Chelsea XI: Courtois; Azpilicueta, Christensen, Cahill; Zappacosta, Kante, Fabregas, Alonso; Willian, Pedro; Batshuayi.

Qarabag XI: Sehic; Garayev, Huseynov, Rzeźniczak, Medvedev; Sadygov; Pedro Henrique, Michel, Richard, Guerrier; Ndlovu.

Goal hmasa ber hi tan atanga minute 5-na leka short corner atanga lut a ni a, Willian ball pek tha tak chu Pedro chuan box pawn atangin kawh zetin a thlawh goal. Goal hnihna hi a pui kher mai, Courtois ball pek chu mual dinglamah Zappacosta chuan chak takin a tlanpui, thui tak a tlanpui hnu chuan mual dinglam sir atangin a shot, Qarabag goalkeeper Sehic chuan a ban phak lo chiang kher mai, goal mawi leh ropui tak a ni.

Goal thumna hi second half 55 mins-a lut a ni a, set piece atanga Cesc Fàbregas cross chu box chhung atangin Azpilicueta chuan a tauh goal. 71 mins-ah bench atanga lut Bakayoko chuan Chelsea goal lina a khung, Chelsea corner hlawhchhuah atanga ball kal zel chu Tiemoué Bakayoko chuan box lai atangin a chhuih goal a ni.

Rei an inkhelh hma 76 mins-ah Batshuayi chuan Tiemoué Bakayoko ball pek chu box pawn atangin a pet goal lehnghal a. Hun tawp dawn minute 8 a la awm tihin dinglam sir atanga Davide Zappacosta cross chu near post atangin Michy Batshuayi chuan a pet goal leh a, si ruk faiin Chelsea chuan hnehna an chang ta a ni.

Davide Zappacosta goal kha Courtois-a siam a ni a, kum 2012 November thlaa Celtic leh Barcelona inkhelh tuma Forster-a'n Tony Watt a siam sak hnua goalkeeper in goal a assist leh hmasak ber a ni. Zappacosta hi transfer deadline day-a Conte-a'n Torino atanga £23m vela a lak kha a ni a, hnehna an chan theih nan hian tha a thawhhlawk nghal hle a ni.

Tin, goal khung tur siamsaktu tia hriat lar Fabregas hian kum 2014-a Chelsea a zawm hnu khan Chelsea tan competition hrang hrangah assists vawi 46 lai a nei. Chelsea-in Stamford Bridge-a Qarabag an mikhual tum hian shots on target vawi 8 chiah an nei, heng zinga vawi 6 chu a goal a ni.

Pictures credit : Getty