Chelsea-in club record transfer fee-in Morata an lalut

22nd July 2017, 06:07AM

Chelsea chuan Real Madrid striker Alvaro Morata chu £60m in an lei a, kum 5 chhung atan contract an ziahpui.

Spanish striker kum 24 mi man hi £70m a kai chho thei dawn nia report a ni a, club pahnih inremnaah hian add-ons £10m a tel nia report a ni.

Season liamta khan Morata hi Zidane chuan chhawr tam lo mahse a khelh chhunah goal a khung thei hle a, goal 20 khung tling thovin La liga leh Champions League title a la nghe nghe.

6ft 3in-a lian Spanish striker hian kum 2008 khan Real Madrid youth team a zawm a, kum 2010 khan kum 18 mi niin senior debut a khel.

Kum 2014 khan Italy panin; Juventus tan kum hnih a khel a, goal 27 a khung a, Serie A title pahnih leh Coppa Italia title a la a, kum 2015 Champions League final a khel bawk.

Nikum khan Real Madrid chuan lei let leh theihna an nei angin Bernabeu-ah an lalet leh ta a ni. Morata hian ram tan game 20 khel tawhin, goal 9 a khung ve tawh a ni.

Chelsea hian tun nipui bazarah goalkeeper Willy Caballero, defender Antonio Rudiger leh midfielder Tiemoue Bakayoko-te an lo lei tawh bawk a, Morata hian Blues pre-season tour neihna Asia a pan ve nghal dawn a ni.

Deigo Costa chuan Chelsea a chhuahsan ngei dawn niin a lang ta a, January thla khan Conte chuan a team plan-ah a tel ve tawh loh thu a hrilh tawh a nih kha. Costa kalna tur hi sawi chian la ni lo mahse Atletico lama kir leh tur nia report a ni a, hetih lai hian loan-in Italy lama a kal hmasak pawh a ngai dawn niin a lang.

Chelsea technical director Michael Emenalo chuan, "Game level sang ber berah pawh Alvaro theihna kan hria, class sang tak a ni a, kan tan bungraw tha tak a ni ngei dawn e," tiin a sawi.

Copyright © inkhel.com 2024. All rights reserved.