Chelsea an ‘Sarrismo’ thei dawn em? Part-1

10th August 2018, 08:08PM

Chelsea chuan manager thar season hmasa lama Napoli manager Maurizio Sarri an laluta, insiam that an tum mek.

Sarri hi a game hmuhnawm avanga lar a nihna chen a awma, Napoli chuan football mawi tak an khelh avangin Sarri-a game hi ‘Sarrismo’ emaw ‘Sarri-ball’ tiin media-te chuan an sawi hial thin.

Chelsea-in Sarri an lakluh chhan hi chhan leh vang tam tak karah Sarri-ball an beisei vang a nih ngei a rinawm a, Chelsea hian Napoli anga game mawi an khel thei ve meuh ang em tih chu zawhna lian tak a ni.

Chelsea player neihsa en chuan an thei dawnin a lang lova, mahse Sarri hian Napoli lama a game khaikhawmtu leh kaihruaitu ber Jorginho a rawn chhawm lut tlat mai.

Sarrismo-ah hian goalkeeper atang in pek chhuah a tama, ball kang vawrh luah luah a tam lova, goal nawr an thupui hle bawka, lei hrula tawi te tea ball in pek a nia, tiki-taka pangai ang ni chiah si lovin, vertical tiki-taka tihte pawhin an lo sawi thin.

Hriatthiam a awlsam nan leh sawifiah a awlsam nan, Napoli lama Sarri-a  first-eleven leh Chelsea player-te inrem dan tura rin atangin tehkhinna angreng kan sawi dawn a ni.

Sarrismo/ Sarri-ball-ah hian Sarri hian 4-3-3 formation a hmanga, goalkeeper atangin ball inpek chhuak a tam kan th tawh kha. Napoli-ah Sarri hian Spanish veteran goalkeeper Pepe Reina a nei a, a chhawr tangkai hle. Reina hi che rang lutuk tawh lo mahse, a ball khawih a dika, a ball pek chhuah (distribution) a tha hle bawka, hei hi Sarrismo-ah a tangkai hle.

Thibaut Courtois erawh a che ranga, a diving a tha a, mahse ball a thiam hran lova, a khawr angreng hle thin. Mahse amah berin chhuah a ngiat ta si a Chelsea chuan an hralh lo thei ta lova, Chelsea fan-te pawhin an dem rawn hle.

Courtois chhuak hi Chelsea tan vanneihna a nih zawk theihna chen a awm tlat. Courtois hi khawvela keeper tha ber zinga mi a ni ngei mai, World Cup Golden Glove award dawng hlim a ni bawk, mahse Sarrismo atan chuan a distribution hi a tha tawk lova, ball a thiam tawk lo bawk.

Courtois a chhuah takah chuan London club hian Sarrismo atana an keeper duh leh mamawh tak an lakluh theih phaha, Athletic Bilbao atangin goalkeeper kum 23 mi Kepa Arrizabalaga chu khawvela keeper manto ber ni turin pound maktaduai 71-in an laluta, football khawvel a meng phar nasa hle.

Courtois a chhuak hi Chelsea tan vanneihna a nih theihna chen a awm kan tih tawh kha, mahse Kepa hi an rin ang leh tum anga a chet that leh chet that lovah a inngat dawn a ni. Kepa hi ft 6’ 2in a nia ,Courtois ang chuan a sang lova, a diving pawh a tha lo zawka, ball kangah pawh Courtois ai chuan a ban tawi dawn tih a chiang reng mai. One-on-one situation-ah pawh tawnhriat ngah zawk Courtois ai chuan a tha lo zawk ngeiin rinawm mahse, Sarrismo atana pawimawh em em Courtois aia that zawkna a nei tlat. Eng dang ni lovin, a ball khawih a dik zawka, a distribution pawh a tha zawk a ni.

Kan hriat tur chu Kepa hi Courtois aia a that lohna kan sawi avang hian diving-ahte, one-on-one situation-ahte a chhia tihna a ni lova, Courtois a tluklo tihna mai zawk a ni a, Courtois pawh a distribution a chhia tihna lam ni lovin, Kepa a tha zawk tihna mai a ni.

Sarrismo atana goalkeeper an mamawh tak Chelsea chuan an nei ta phawt, rin ang leh tum angin a chet that dawn leh chat that dawn loh chu hriat a la ni lo.

Tunah full-back lam kan khaikhin leh anga, Napoli-ah khan Sarri hian right-back-ah Elsied Hysaj a hmang bera, left-back-ah Faouzi Ghoulam a hmang thung. Sarrismo-ah hian full-back-te hi an ‘up’ lutuk lem lova, a tul huna han ‘up’ nasat deuh chang nei mahse a tam zawkah chuan half-line an pel thui lutuk lem lo.

Chelsea hian Cesar Azpilicueta chu right-back –ah an hman a rinawm a, left-back-ah Marcos Alonso an hman a rinawm. Anni pahnih hi Hysaj leh Ghoulam –te aia ngaihtuahawm em em tur an nih a rinawm lova, Alonso erawh natural-wing-back a nih avangin a insiamrem nasat a ngai viau maithei.

Centre-back lamah hian Sarri chuan Raul Albiol leh Kalidou Koulibaly a hmanga, an pahnih hian an ball khawih a dika, English defender pangai ho anga defense lam ngawr ngawra tha an ni lo.

Albiol leh Koulibaly hi an inkawp fuh hle a, ball an thiam thawkhat a, an passing a tha a, tlar hnung atanga ball sem an thei hle. Hemi anih avang hian Sarri hian David Luiz a hman a rinawm a, ani hi ball khawih dik thawkhat tak, long-pass tha a a nia, first-eleven a chan ngei a rinawm.

Luiz hian tunge a dinpui ang tih hi zawhna a awm a, sawi a harsa tawha, Gary Cahill, Antonio Rudiger, Andreas Christensen-te an la awm. Ampadu leh Zouma-te hi chu loan-a an chhuah ngei a rinawm avangin sawi lan an ni rih lo.

Luiz ai hian Christensen pawh hian duhsak a hlawh theia, ani hi passing tha em em a ni a, a la naupan deuh avangin, game pawimawh-ah a naupanna a lang leh zeuh thin avangin Luiz nen an inel hle tura ngaih an ni.

Post hi a thui dawn lutuk avangin midfield chin chu post hranah ziah zawm a ni ang.

Copyright © inkhel.com 2024. All rights reserved.