14 Sep 2018 10:19

inkhel

​Chawnpui FC leh Ramhlun North FC an inhneh tawk

Mc Dowell's No 1 Soda Mizoram Premier League (MPL) Season 7 round 2 match hnuhnung berah kai thar Chawnpui FC leh Ramhlun North FC te chak zawk awmlo in 1-1 in an inhneh tawk. 

September ni 14, Zirtawpni zan inkhelah Ramhlun North FC chuan first half-ah Lalliansanga (Notea) goal hmangin hmahruai mahse, second half-ah Chawnpui FC chuan Vanlalthanga goal hmangin an siphurh an rul a, Chawnpui FC winger Vanlalthanga chu Man of the match-ah thlan a ni.

07:00 PM Chawnpui FC 1-1 Ramhlun North FC

(Vanlalthanga 63') (Lalliansanga 35')

MoM: Vanlalthanga, Chawnpui FC

Chawnpui FC hian an match hmasa berah 0-1 in Champion lai Chhinga Veng FC an hneh lo a, Ramhlun North FC an draw leh a, khelh tawhah point 1 an nei a, Ramhlun North FC hian an match hmasa berah 0-2 Chanmari FC an hneh lo a, Chawnpui FC an draw leh a khelh tawhah point 1 an nei ve bawk.

Inkhel tan a ni a, Ramhlun North FC chuan inkhel thunun nghal mahse goal hlauhawm erawh Chawnpui FC chuan an nei hmasa zawk a, Vanrammawia Ngente leh Vanlalthanga chuan Ramhlun North FC keeper Sangpuia tan hna hautak an siam lo. Ramhlun North FC pawhin goal thunna hun tha neiin Liberian midfielder Waheet Adekunle chuan goal thunna hun tha a hloh ve bawk.

Ramhlun North FC chuan nawr chhunzawmin first half huntawp dawn minute 5 ala awmin Chawnpui FC keeper Malsawma ball pet sual chu Lalliansanga (Notea) chuan nangchinin a pet goal-a. First half-ah Ramhlun North FC chuan 1-0 a hmahruaiin chawlh lawk an hmang ta a ni.

Second half-ah tan a ni a, Chawnpui FC chuan annawr nghal a, mual dinglam sirah Vanlalthanga che a hmuh nawm hle. Minute 63-ah an hun tha neih hmang tangkaiin freekick atangin Vanlalthanga chuan an siphurh sutna goal a khung. Ramhlun North FC chuan goal thun belh ngei tumin nawr let mahse goal an thun mai thei tawh lo. Chawnpui FC pawhin goal an thun belh thei tawh bik lo a, chak zawk awmlo in 1-1 a inhneh tawkin khelmual an chhuah san a, point 1 an hlawh chhuak ve ve ta a ni.

(adsbygoogle = window.adsbygoogle || []).push({});