India boxer ropui ber MC Mary Kom chuan boxing chawlhsan a la tum loh thu sawiin, a la tih theih loh pakhat puitlin a la tum thu sawiin, a chawlh hma ngeiin Olympic gold medal lak a tum thu a sawi.
Kum 35 a upa Mary Kom hian kar hmasa khan Australia-a Commonwealth Games 2018 ah khan gold medal a dawng a, CWG bikah hian a vawi khat dawnna niin hei bakah hian amateur world championship title panga leh London Olympic 2012 bronze medal a lo dawng tawh a ni.
‘Magnificient Mary’ an tih hial mai Mary Kom hian hun tha a la neih thu sawiin, a boxing glove chu dahbo mai a la tum loh thu a sawi a. Tun hnaiah chawlh tum anga an lo sawi chu thu belh chian dawl lo mai a nih thu a sawi.
“Chawlh chungchang hi ka la sawi lo reng reng a, tunhnaia thu thang dik lo vel mai mai a ni a. Ka chawl dawn ni awma sawi hi ka hriat tirh chuan kei ngei pawhin mak ka ti hial zawk a ni,” tiin Mary chuan a sawi a.
“Ka duh ber chu Olympic gold medal lak a ni a, chumi la tur chuan beiseina ka la nei reng bawk,” a ti a. Rio 2016 Olympics ah khan a tel thei ta lo hlauh a, Tokyo 2020 ah erawh tel ngei a tum mai bakah gold medal lak ngei a tum hle.
Fa pathum nei tawh mahse nikum November thla khan Asian Women’s Championship title a la leh a, vawi 5 a la tling tawh a, Mary aia he title la hnem hi an la awm lo a. A kum chu engmah a nih loh thu sawiin, hei vanga chawlh chu a tum lo hle a ni.
“Tu in nge ka kum avanga chawlh tur ti? Chutiang an awm a nih chuan ka hmaah hian rawn kal se, eng thil nge ka tih theih ka lo entir ang,” tiin fiamthuin a sawi a. “Kum hi chu rilruah dah loh tur ania, ka taksa hian min peihlohsan hunah chauh chawlh ka tum,” a ti bawk.